Edhe pse bashkëpunimi mes liderëve rus dhe koreano-verior është tashmë një fakt i njohur, problemi i kësaj aleance është edhe fakti se Koreja e Veriut në këtë mënyrë mund t’i hapë mundësinë Kinës që të ndihmojë Moskën pa asnjë sanksion nga Perëndimi.
Që në fillim të muajit të ardhshëm, ushtarët e Koresë së Veriut duhet të mbërrijnë në tokën e Ukrainës për të treguar mbështetje për Rusinë në luftë, njoftoi Pheniani këtë javë, vetëm pak ditë pas vizitës së liderit rus Vladimir Putin në kryeqytetin e Koresë së Veriut.
Me atë rast, të dy vendet nënshkruan edhe një marrëveshje me të cilën angazhohen për ndihmë të ndërsjelltë ushtarake në rast lufte apo pushtimi të vendeve të tyre, të cilën lideri i Koresë së Veriut Kim Jong Un po e përdor për të dërguar trupa në Evropë.
Ushtarët e Koresë së Veriut duhet të mbërrijnë për të ndihmuar rusët në Donetsk, në korrik. Deri më tani, Koreja e Veriut ka ndihmuar tashmë Rusinë me gati dy milionë copë municione, raketa për disa sisteme raketore dhe dyshohet se disa raketa balistike. Pavarësisht bashkëpunimit tashmë të njohur mes këtyre dy liderëve, dërgimi i ushtarëve do të jetë një hap i ri që i ka bërë ekspertët të pyesin: A do të thotë kjo edhe një përshkallëzim i mundshëm i konfliktit?
“Nëse do të isha në krye të stafit ushtarak të Koresë së Veriut, do të rishqyrtoja vendimet e mia për të dërguar forcat e mia si mish për top në luftën e paligjshme kundër Ukrainës – ne kemi parë llojet e humbjeve që kanë forcat ruse”, u tha nga një zëdhënës i Pentagonit.
Megjithatë, problemi është shumë më i madh – ky lloj bashkëpunimi midis Rusisë dhe Koresë së Veriut hap një derë të vogël për mundësinë që Kina të shmangë sanksionet, ndërsa ende ndihmon Moskën në konfliktin në Ukrainë. Pikërisht këtë ka shpjeguar për Daily Express, ish-deputeti rus Ilya Ponomarev.
“Koreja e Veriut është një nga partnerët kryesorë të Rusisë dhe arsyeja pse ata u bënë një partner i tillë është se ata veprojnë si një urë lidhëse midis Kinës dhe Rusisë. Në fakt, të gjitha pajisjet ushtarake që merren nga Koreja e Veriut janë zhvilluar nga kinezët. Kina është i kujdesshëm që të mos ndeshet me sanksione dytësore të SHBA-së, por Koreja e Veriut nuk është në rrezik, kështu që nuk ka asnjë problem që kinezët të ndihmojnë koreano-veriorët dhe më pas koreanoveriorët të bëjnë tregti me Rusinë dhe të përfitojnë prej saj si financiarisht, ashtu edhe në aspektin ushtarak”, shpjegoi ai. /tesheshi.com/
