“Një person i sëmurë mendërisht i mbushur me megalomani“, kështu e cilësoi presidentin amerikan, Donald Trump, ministri e Jashtëm të Koresë së Veriut, pas deklarataës së këtij të fundit se sulmi ndaj tokës amerikane është i “pashmangshëm”.
Ri Yong – ho foli disa orë pasi avionët amerikanë fluturuan më afër se kurrë shtetit komunist, për herë të parë në këtë shekull.
Ri iu kundërpërgjigj Trump, pasi ky i fundit e cilësoi Kim Jong-un “njeriu raketë” dhe tha se kishte ndërmarrë një “mision vetëvrasës”.
Në fjalën e tij, Ministri i Jashtëm koreano-verior shtoi se askush tjetër përveç Trump nuk është në një mision vetëvrasës.
“Vizitat e raketave tona në tokën amerikane janë edhe më shumë të pashmangshme.
Pavarësisht pengesave të shumta, tani jemi në hapat e fundit të fazës përfundimtare të përmbylljes të forcës bërthamore të shtetit”, tha Yong-ho, duke folur nga e njëjta sallë e OKB-së, ku Trump sulmoi diktatorin Kim Jong Un.
Por gjatë një mitingu me votuesit republikanë në Alabama, Trump tha se “njeriu-raketë” ishte një çështje që duhej të diskutohej më parë nga Clinton dhe Obama.
”Duhet të ishte diskutuar vite më parë, por nuk është diskutuar. Aktualisht unë po interesohem për këtë çështje pasi ne duhet ta zgjidhim atë”, tha Trump.
Trump mbrojti idenë e tij, sipas së cilës demokratët nuk kanë hedhur hapat e nevojshëm në çështjen e Koresë së Veriut.
Pasi ka vënë theksin se çështja koreano-veriore duhej zgjidhur, Trump tha se “nuk kemi alternativë tjetër”.
“Ndoshta disa hapa do të funksionojnë, disa jo. Unë personalisht nuk jam i sigurt se do të funksionojnë, por sido që të ndodhë mund të them se jemi të sigurt”, deklaroi ai. /tesheshi.com/
