Edhe pse Koreja e Veriut është një nga vendet e pakta që nuk raportojnë asnjë rast të infeksionit me koronavirus, udhëheqësi i shtetit Kim Jong-un ka bërë thirrje për masa më të rrepta për të luftuar pandeminë në një takim të zyrës politike të Partisë së Punëtorëve, njoftoi sot agjencia shtetërore KCNA.
Koreja e Veriut mund të falënderojë për suksesin e saj në luftimin e pandemisë “me masat e rrepta, të mprehta dhe të domosdoshme anti-epidemike që janë marrë”, njoftoi KCNA. Takimi i së shtunës diskutoi përhapjen e shpejtë të koronavirusit të ri në të gjithë botën “pavarësisht nga kufijtë dhe kontinentet”.
Pyongyang-u mbylli kufirin me Kinën dhe kufizoi transportin e njerëzve dhe mallrave, dhe në një takim të shtunën miratoi një vendim të përbashkët për “masa edhe më gjithëpërfshirëse të qeverisë për të ruajtur jetën dhe sigurinë e njerëzve nga epidemia e madhe në botë”. /tesheshi.com/
