Koreja e Veriut ka hapur derën për turistët rusë, duke lëshuar një licencë për agjencinë e parë të udhëtimit në Moskë, e cila premton “zhytje të plotë” në kulturën kombëtare dhe një shewtitje “më të sigurt se shwtitja në mbrëmje nëpër rrugët e Londrës”. Nkorean.ru, një kompani ruse e licencuar nga qeveria e Koresë së Veriut ofron turne të organizuar për grupe deri në 10 persona ose individë që duan të njohin jetën në këtë vend. Ata që udhëtojnë në Korenë e Veriut duhet të kalojnë një “kontroll” para nisjes dhe gjithmonë të shoqërohen nga një udhërrëfyes i cili do të mbikëqyrë “sjelljen e duhur të turistëve dhe do të garantojë sigurinë e tij”. Fotografimi i objekteve strategjike dhe ushtarake është i ndaluar dhe bisedat afatgjata me popullatën lokale “nuk janë të rekomanduara”.
Koreja e Veriut ka kryer teste bërthamore dhe dhjetra teste të raketave që nga fillimi i vitit të kaluar, duke rritur ndjeshëm tensionet në gadishullin e militarizuar korean, pavarësisht rezolutave të Këshillit të Sigurimit të OKB-së. Të ballafaquar me probleme ekonomike të cilat janë rënduar edhe nga sanksione të shumta, qeveria e Phenianit dëshiron të zhvillojë turizmin në mënyrë që të fitojë para, raporton Reuters.
Turneu më i shtrenjtë 15-ditor i “zhytjes së plotë në kulturën e Koresë së Veriut” kushton rreth 118,090 rubla ($1,997), duke përfshirë vizitat në ferma, burime të ujit mineral, tempujt budistë, shëtitje malore dhe një hyrje në kuzhinën kombëtare. Ka edhe vizita të shumta të muzeve të themeluesit Kim Il-Sung. Ture më pak të kërkuara përfshijnë relaks në plazh, shfaqje të avionëve dhe madje edhe festival të birrës.
Nuk është e njohur sa do të jenë këto udhëtime të popullarizuara në mesin e rusëve të cilët kanë zhvilluar tashmë një dashuri për vizita të këndshme në Evropë dhe resorte turistike të volitshme në Turqi dhe Tajlandë, shkruan Reuters. /tesheshi.com/
