Prova e pestë bërthamore e Koresë së Veriut, e kryer para pak ditësh, i ka trazuar edhe njëherë ujërat në rajonin e paqetë aziatik.
Koreja e Jugut raportohet të ketë përgatitur një plan për ta rrafshuar Phenianin, kryeqytetin koreanoverior, në rast se do të ketë shenja të nisjes së një sulmi bërthamor.
Një burim ushtarak nga Seuli deklaroi se vendi i tij është gati për t’i shkatërruar plotësisht Phenianin dhe vendet e mundshme të strehimit të zyrtarëve të lartë të Koresë së Veriut.
“Çdo pjesë e Phenianit, veçanërisht aty ku ka gjasa të fshihet udhëheqja koreanoveriore, ka për t’u shkatërruar plotësisht nga raketat balistike dhe nga predhat e fuqishme shpërthyese sapo Veriu të tregojë ndonjë shenjë të përdorimit të një arme bërthamore,” u citua ky burim ushtarak nga agjencia lokale e lajmeve Yonhap.
“Me fjalë të tjera, kryeqyteti i Veriut do të bëhet pluhur e hi e do të fshihet nga harta,” ka vijuar citimi i burimit ushtarak nga agjencia e lajmeve.
Informacioni i mësipërm bazohet në një plan të paraqitur javën e shkuar ligjvënësve koreanojugorë nga Ministria e Mbrojtjes.
Koreja e Jugut po kërkon aktualisht mbështetje ndërkombëtare për sanksione më të ashpra për Phenianin. /tesheshi.com/
