Nga Vepror Hasani
Bashkia e Korçës nuk ka të dhënë të sakta mbi numrin e romëve dhe egjptianëve që jetojnë në qytetin e Korçës. Për rrjedhojë edhe politikat e hartuara prej saj për mirëqenie, dhe ndihmë sociale, ashtu sikurse edhe për zhvillim arsimor, kulturor dhe sportiv të të rinjve të komuniteteve të përmendura më lart, nuk mund të jenë rezultative. Padija e Bashkisë Korçë ra në sy të të gjithëve gjatë përurimit të një mjedisi sportiv për të rinjtë e komunitetit rom dhe egjiptian, ku ishin të pranishëm ministri i Mirëqenies Sociale dhe Rinisë, Bledi Klosi, znj. Zineb Toum-Benjelloun, kordinatore e Agjencisë së OKB-së në Shqipëri dhe shefi i Bashkëpunimit të Delegacionit të BE-së në Shqipëri, Yngve Engstrom.
Gjatë përurimit të kompleksit sportiv u shpërnda për të pranishmit një material i shkurtër, i cili bënte me dije kush ishin financuesit dhe zbatuesit e projektit etj. Materiali fliste edhe për numrin e banorëve romë dhe egjitianë që jetojnë në qytetin e Korçës. Sipas Bashkisë, në Korçë jetojnë 2,000 romë dhe egjiptianë, por shoqatat e dy komuniteteve, jo sot, por prej vitesh japin shifra të tjera: vetëm romë janë 2,000, kurse numri i egjiptanëve shkon në 18,000 banorë. Të jetë lapsus i Bashkisë Korçë apo mungesë vëmendjeje? Nuk e dimë.
Më konkretisht, në materialin e shpërndarë nga bashkia shkruhej: “Rreth dymijë familje nga komuniteti rom dhe egjiptian, dhe komunitete të tjera jo-rome dhe egjiptiane, që jetojnë në Korçë, janë përfituese të dy ndërhyrjeve të financiuara nga BE-ja me vlerën 160.000 euro dhe të zbatuara nga PNUD-i, në bashkëpunim me Ministrinë e Mirëqenies Sociale dhe Rinisë”.
Flitet për dy ndërhyrje, pasi terreni sportiv ka si pjesë të vetën edhe një ndërtesë të vogël, e cila shërben si qendër ndërkulturore komunitare, (për aktivitete dhe mbledhje). Kjo pjesë e projektit, (ndërtesa), u përurua nga kryetari i Partisë Socialiste, Edi Rama, gjatë fushatës elektorale për zgjedhjet vendore, ndërsa për inaugurimin e terrenit sportiv mori pjesë posaçërisht ministri Klosi. Gjithçka ishtë përgatitur me kujdes. Disa fëmijë romë që luanin futboll dhe disa të tjerë që bënin rolin e spektatorit, veçse për numrin e tyre bashka nuk kishte patur dijeni.
Oratorët që morën fjalën, vunë në dukje faktin se terreni sportiv i romëve dhe egjiptianëve do të ishte në dispozicion edhe të të gjithë të rinjëve të qytetit të Korçës. Pra, e thënë më qartë, kompleksi sportiv do të quhet i romëve dhe egjiptianë, kurse realisht do të jetë i gjithë të rinjve të qytetit të Korçës, madje “edhe i disa komuniteteve të tjera jo rome ”, siç thuhet në njoftimin e Bashkisë, por që kjo e fundit nuk i cilëson cilat janë ato. Bashkia e Korçës ishte bashkëfinancuese e projekteve të mësipërme. /tesheshi.com/
