Edhe matematikisht Skënderbeu ka humbur të gjitha gjasat për të vazhduar edhe më tej aventurën në garën e Europa Ligës. Disfata në udhëtim (2-0), nga Beshiktash e çimenton skuadrën korçare në fundin e klasifikimit me vetëm tre pikë, pas asnjë gjasë të vetme, edhe pse ka edhe një ndeshje për të luajtur ndaj CSKA Moskës, të cilën do ta shfrytëzjë për prestigj.
Ndeshja nisi me ritëm të lartë me kampionët e Shqipërisë në tentativë, që nuk tregohen aspak inferior përballë nikoqirëve. Bernard Berisha është i pari ai që rrezikon portën vendase, por pret mjaft mirë portieri Tolga. Disa minuta më vonë, Hamdi Salihi, shpërdoron një mundësi të artë shënimi, deri sa i vetëm me gardianin turk, gjuan skaj shtyllës pingule, duke lëshuar kështu mundësinë më të mirë në ndeshje për korçarët. Në momentin më të mirë të besuarit e Mirel Josës ndëshkohen. Një goditje me kokë e futbollistit Cenk Tosun përfundon në rrjetën e Shehit, (1-0).
E njëjta “këngë” edhe në fraksionin e dytë të lojës. Skënderbeu vargon rastet e mira, Beshiktash realizon. Latifi ka mundësinë më të mirë për të barazuar rezultatin, por goditja e tij me kokë ishte e pafuqishme për të mposhtur gardianin Tolga. Ndërkohë, Beshiktash realizon edhe një herë përmes futbollistit Tosun për të mbyllur çdo dilemë sa i përket fituesit, (2-0).
Kështu, korçarët detyrohen të pranojnë disfatën në një tjetër transfertë, megjithëse loja të cilën e zhvilluan ka merituar të marrë të paktën një pikë nga kjo ndeshje. Grupin H, e kryeson Beshiktash që ka tani 9 pikë, e pasuar nga Lokomotiva e Moskës që ka 8, Sporting Lisbona 7 dhe Skënderbeu në fund me 3. /tesheshi.com/
