Njëri nga zyrtarët e lartë të AKR-së, Korab Sejdiu, ka bërë të ditur sot largimin nga të gjitha postet në partinë e Behgjet Pacollit. Ai nuk është pajtuar me koalicionin që kjo pari ka bërë me PAN-in dhe ka paralajmëruar votimin kundër zgjedhjes së kryeparlamentarit dhe kundër qeverisë.
Pas këtij vendimi, AKR-ja zyrtarisht mbetet me tre deputet, pasi Sejdiu ka bërë të ditur se për momentin do të mbetet deputet i pavarur, pa treguar nëse do i bashkohet më pas grupit parlamentar të LDK-së.
Deklarata e Korab Sejdiut
Më lejoni që fillimisht të kërkoj ndjesë për pamundësinë time objektive që të përgjigjem në mijëra thirrje që më kanë ardhë në ditët e fundit. Njëherësh, ju falenderoj shumë për durimin për të më dhënë kohë që të reflektoj dhe vlerësoj rrethanat e reja të krijuara në vend.
Sot shkruaj për t’ju dhënë dy njoftime.
Unë e kuptoj se politika është arti i së mundurës, dhe se të qenurit në politikë kërkon nganjëherë dhe bërjen e kompromiseve të dhimbshme. Mirëpo, unë ndaj mendimin e atyre që kur bëhet fjalë për interesat e shtetit, nuk na lejohet të bërit kompromis.
Unë në vazhdimësi kam qenë konsistent me qëndrimin që një qeveri me pakicë shqiptare dhe e kushtëzuar nga Lista Serbe është në kundërshtim me interesat e shtetit sepse mbetet peng i regjimit të Beogradit. Rrjedhimisht edhe kam theksuar se nuk mund t´a mbështes një gjë të tillë. Për më tepër, kam bërë tentativa të sinqerta me shumicën shqiptare (LAA dhe VV) që të formojmë alternativën qeverisëse që ka legjitimitet nga populli. Jam tepër i zhgënjyer që interesat e ngushta partiake pamundësuan realizimin e këtij qëllimi, përkundër momentit jetik për të larguar të keqen nga ky vend. Ju njoftoj se do t’i qëndroj besnik fjalës së dhënë ndaj elektoratit tim, dhe në seancën konstituive do të votoj kundër në të dyja instancat, edhe zgjedhjen e Kryeparlamentarit por edhe të Qeverisë.
Unë mendoj se ne si përfaqësues të popullit, kemi pasur një mundësi të rrallë kësaj rradhe që t’i jepnim Kosovës kthesën drejt të mirës. Fatkeqësisht, për arsye të pakuptimta për mua, ky qëllim nuk u realizua. Në anën tjetër, është më se e qartë se unë dhe Aleanca Kosova e Re (AKR) kemi mendime të ndara sa i përket asaj se çka mendojmë është në të mirë të vendit, dhe në këtë është evidente që qëndroj i vetëm në këtë subjekt. Unë nuk kam dëshirën e as vullnetin që të shkeli mbi nderin dhe fjalën time. Por njëkohësisht, nuk kam të drejtë morale që të votoj kundër një Qeverie ku pjesë përmbajtësore është Presidenti Pacolli dhe AKR, përderisa unë jam pjesë e AKR.
Për t’i evituar këto, ju njoftoj se sot kam deklaruar te kryetari Pacolli dorëheqjen time nga AKR dhe nga të gjitha postet në strukturë të këtij subjekti, me efekt të menjëhershëm. Unë kam falenderuar Presidentin Pacolli për bashkëpunimin e deritashëm dhe vullnetin e tij të sinqertë që të jem edhe pjesë përbërëse e rrugëtimit të AKR-së në qeverinë e ardhshme. Lutem që dorëheqja ime të merret thjeshtë si veprim moral që t’i qëndroj besnik fjalës sime në këtë moment vendimtar për vendin.
Veprimtarinë time politike tani për tani do ta vazhdoj si deputet i pavarur në Kuvendin e Republikës së Kosovës. /tesheshi.com/
