Ish-aleatja katëvjeçare e PS-së në qeverisje, LSI, me gojën e gruas që e udhëheq, Monika Kryemadhi, ka denoncuar rëndë pushtetin e Ramës sektor më sektor, duke mos e kursyer dhe nga të shpallur si “tradhëtar” ndaj Kosovës.
“Sjellja e tij ndaj Kosovës, është qartësisht antishqiptare”, tha Kryemadhi në një Konventë të degës së LSI-së për Tiranën, referuar paktit për Schengenin rajonal, edhe pse ky i fundit ka përkrahje të fortë amerikane.
Me gjuhë të ashpër, znj.Kryemadhi, njëherësh me bashkëshort president të zgjedhur nga mazhoranca, vijoi ta akuzojë këtë të fundit për dështime në çdo sektor.
“Politika jo humane dhe dritëshkurtër e Rilindjes ngriti taksat për shqiptarët dhe bizneset dhe si rezultat me mijëra biznese u mbyllën.
Mbyllja e mijëra bizneseve erdhi edhe si rezultat i korrupsionit të paprecedent të taksidarëve të Rilindjes. Biznesi vendas por edhe investitorët e huaj janë lënë në dorë të gjobëvënësve dhe klientëve kriminalë të qeverisë. Ndaj Shqipëria ka nivelin më të ulët të investimeve të huaja në rajon, dhe ka rënë poshtë në treguesit e klimës së biznesit.
Kthimi i ekonomisë shqiptare në një lavatriçe e pastrimit të parave të drogës të trafiqeve ka dëmtuar ekonominë në afatgjatë, duke shkatërruar konkurrencen dhe tregun e lirë.
Bilanci i 2019-të na tregon qartazi se kjo është qeveria e dështimeve të mëdha edhe në bujqësi. Ne sot mbajmë vendin e fundit në rajon për produktivitetin, eksportet dhe për mbeshtetjen e prodhimit bujqësor. Dhe dështimi për të mbështetur bujqësinë është dështim për të mbështetur gjysmën e popullsisë shqiptare që merret me të, e cila, në 80 përqind të saj punon për tu ushqyer vetë, pra, për të mbijetuar”, ishin disa nga dhjetra akuzat e znj.Kryemadhi.
Por siç mund të vërehet, ligjërimi i saj është po njësoj si i ai i opozitës klasike – PD-së. Ndërkohë, nuk janë të dyja njësoj, edhe pse të dyja në opozitë, deri dhe në aleancë. Kjo pasi LSI ka qeverisur 4 vite me PS-në. Thënë ndryshe, ka patur gati gjysmën e shtetit, gjysmën e vendimarrjes në çdo sektor. Dhe ajo që i mungon LSI-së, jo vetëm si moral politik por dhe si praktikë opozitare, është fakti se kurrë nuk denoncon me dokumenta. Që do të thotë: kurrë nuk nxjerr ndonjë dokument kompromentues për Ramën, i cili t’i përket kohës kur bashkëqeverisnin.
Çdo vendimarrje e Ramës, e ministrave të tij, ka patur mbi kohë dhe ata të LSI-së. Por kjo e fundit ende nuk ofron ndonjë dëshmi mbrapshtie të kreut të mazhorancës. Fjala vjen, çështja e shumëdiskutuar e me shumë dritëhije e kanabizimit të vendit, mund të ishte sqaruar e vërteta me ndihmën e LSI-së. Njeriu i saj ka qenë afër njeriut kyç të asaj periudhë, pra afër Saimir Tahirit, duke qenë zëvëndës i tij. Ngjashëm dhe për shumë vendimmarrje për praktika koncensionare, si në rastin e tarifimit të Rrugës së Kombit, ku studimi që nxorri 5-euroshin e pagesës ka firmën e njerëzve të LSI-së.
Pra, kjo forcë nuk mund të flasë si PD. Partia Demokratike është opozitë klasike dhe veçon për llojin e artikulimit të akuzës, që është gjithashtu klasike. Ndërsa LSI duhet të flasë ndryshe. Më e pakta, ajo duhet të nxjerrë dokumenta, e të tregojë nëpërmjet tyre vendimmarrjet korruptive, se si ajo i ka kundërshtuar në atë kohë (nëse ekzistojnë të tilla dhe nëse ajo vërtet ka kundërshtuar), apo episode të dokumentuara të luftës me Ramën për moralin apo efektivitetin qeverisës. Deri më sot nuk ka dhe kjo e bën të pabesueshme kur flet, a më saktë çirret…/tesheshi.com/
