Pjesëmarrja masive në konventën promovuese të Lëvizjes BESA në Maqedoni ka tërhequr vëmendjen e të gjithëve. Ky fakt është përshëndetur edhe nga ish-gazetari e kandidati për deputet në radhët e partisë opozitare maqedonase, LSDM-së, Muhamed Zekiri, ashtu si dhe aktivisti i “Revolucionit Laraman”, Bobi Ilievski.
Sipas Zekirit, ndryshe nga partia shqiptare në pushtet, BDI, e cila dy ditë më parë me shantazhe dhe presione mezi arriti ta mbushte sallën, BESA si një forcë e re në politikbërjen maqedonase e mbipopulloi po të njëjtin ambjent me qytetarë, që kishin ardhur me vullnetin e tyre të lirë.
“BESA e fundosi DUI-n, vetëm dy ditë pasi ata me shantazhe dhe presione sollën njerëzit në këtë sallë. Këta njerëz këtu sonte janë zëri i popullit, siç janë edhe gjithë të tjerë që përkahin opsionin e opozitës. Koha e kriminelëve dhe diktaturës DUI-VMRO mori fund!!!”, ka shkruar gazetari Muhamed Zekiri.
Nga ana tjetër, një prej aktivistëve më të njohur të sektorit civil, sidomos të “Revolucionit Laraman”, Bobi Ilievski në profilin e tij në facebook ka postuar një foto të tubimit madhështor të Lëvizjes BESA e shoqëruar me një tekst të shkurtë, ku mes të tjerash thuhet se BESA do ta “shkatërrojë” BDI-në.
“BESA do ta shkatërrojë BDI-në. Kishte pasur edhe simpatizues jashtë sallës “Boris Trajkovski”. Ajo që të krijon përshtypje është pjesëmarrja masive e gjinisë femërore”, ka shkruar Bobi Ilievski./tesheshi.cm
