Njëri nga futbollistët e treshes së frikshme sulmuese të Barcelonës ka arritur marrëveshjen me klubin për një kontratë të re. Luis Suarez ka gjetur gjuhën e përbashkët me katalanasit për një kontratë që do ta mbajë atë në klub gjer në 2021-shin, me të drejtë rinovimi dhe për një vit tjetër.
Kontrata do të nënshkruhet ditën e sotme në selinë zyrtare të Barcelonës, dhe ka një klauzolë lirimi në kuotën e 200 milionë eurove.
Suarez iu bashkua Barcelonës në 2014-n, ndërsa ia kishte dalë më herët të bëhej lojtari kyç i Liverpulit. Ai shpejt do të shndërrohej dhe te klubi katalanas në një prej lojtarëve të pazëvendësueshëm. Në 116 takime me bluzën e Barcelonës, Suarez ka shënuar 97 gola, përpos 57 pasimeve për gol.
Tetë janë trofetë e fituara që ai ka fituar me Barcelonën, si atë të kampionatit spanjoll, të Champions League-s, të Superkupës Europiane e të Kupës së Botës për Klube.
“Ndjehem plotësisht i lumtur, sepse jam ku dua të jem,” deklaroi sulmuesi uruguajan një ditë më parë në një aktivitet të Adidasit.
“Që klubi më ka dhënë një rinovim, do të thotë se ata janë të lumtur me paraqitjen time… Unë kurrë nuk do ta humb ambicien dhe entuziazmin për të shënuar gola dhe për të fituar trofe. Lumturia ime do të bëhet më e plotë vetëm nëse dhe Messi e përtërin kontratën e tij.”
Luis Suarez ka shënuar dhjetë gola në 15 javë të kampionatit spanjoll në vijim, aq sa dhe Cristiano Ronaldo. Një më shumë ka realizuar Messi, që udhëheq listën e golashënuesve. /tesheshi.com/
