Nga Bashkim Kastrati
Edhe pse që nga muaji shtator i vitit 2013 ka filluar ndërtimi i 12 kontejnerëve nëntokësorë në qendër të Prishtinës, ata kanë mbetur vetëm si dekor, pasi që nuk janë vënë në përdorim fare. Ndërtimi këtyre kontejnerëve ishte tejzgjatur dhe ka përfunduar në fund të vitit të kaluar, por tash e disa muaj puna ka ngecur këtu.
Këta kontejnerë nëntokësor nuk po funksionalizohen, për shkak se nuk ka kamionë me mekanizëm të përshtatshëm për të ngarkuar dhe zbrazur mbeturinat nga kontejnerët. Menaxhmenti i kaluar kur ka filluar ndërtimin e kontejnerëve nëntokësor si duket nuk e ka planifikuar se kamionët e thjeshtë nuk mund të jenë të përdorshëm, ndërsa menaxhmenti aktual ende nuk ka arritur që të blejë kamionë të tillë, me arsyetimin se kompanitë që kanë ofertuar në tenderin për këta kamionë kanë pasur oferta të papërshtatshme.
Pra në situatën aktuale qytetarët do të vazhdojnë që edhe në qendër të qytetit të përballen me kundërmimin e kontejnerëve mbitokësor, të cilët janë gjithmonë të stërmbushur dhe përveç kundërmimit të madh edhe po e shëmtojnë qytetin.
Ndërsa afër kontejnerëve në fjalë, gjenden ata nëntokësor që aktualisht po shërbejnë vetëm si një dekor.
Kontejnerët nëntokësorë janë të vendosur në 12 pika në 10 rrugë të kryeqytetit siç janë: “Luan Haradinaj”, “UÇK”, “Agim Ramadani”, “Garibaldi” Rexhep Luci”, “Fehmi Agani”, në lagjen Dardania dhe në lagjen “Dodona”.
Zbrazja e këtyre kontejnerëve duhet të bëhet nëpërmjet sistemit hidraulik, me kamionë të posaçëm. Vlera e projektit për ndërtimin e këtyre pikave ka pasur koston prej 235 mijë euro.
Zëdhënësja e Komunës së Prishtinës Miranda Mullafazliu-Bejta, ka thënë për tesheshi.com se punët ndërtimore për këta kontejnerë kanë përfunduar dhe është proceduar për prokurim
adoptimi i katër kamionëve ekzistues të cilët do të operojnë në heqjen e mbeturinave nga këta kontejner.
“Kontejnerët nëntokësor nuk kanë funksionuar deri më tani ngase punët në tërësi kanë
përfunduar kah fundi i vitit të kaluar dhe adoptimi i kamionëve është anuluar dy herë për shkak të ofertave joserioze, të cilat nuk i kanë plotësuar kushtet në bazë të kërkesave që kamionët të adoptohen sipas modelit të kontejnerëve nëntokësor”, thotë Mullafazliu-Bejta.
Ajo thotë se Komuna e Prishtinës ka planifikuar që brenda këtij viti ndërtimin e edhe të disa kontejnerëve nëntokësor dhe do të vazhdohet prapë në Zonën Qendër për t’i zëvendësuar kontejnerët aktual me ata nëntokësor. Ajo thotë se kjo vlen për vendet ku këtë e lejojnë kushtet teknike për të u vendosur kontejnerët nëntokësor.
“Kështu do të vazhdojmë deri në përmirësimin e gjendjes se pikave ku janë të vendosur këta kontejnerë si dhe kushtet e menaxhimit të mbeturinave, në mënyrë që të përmirësojmë ambientin ku jetojmë dhe të ruajmë shëndetin publik”, ka thënë Mullafazliu-Bejta, duke mosprecizuar ndonjë afat kohorë se kur mund të kryhen procedurat e radhës së prokurimit dhe të funksionalizohen kontejnerët nëntokësor që janë shumë të domosdoshëm.
Qytetarët: Kontejnerët nëntokësor të domosdoshëm
Qytetarët fillimisht e kanë mirëpritur ndërtimin e kontejnerëve nëntokësor dhe e kanë parë si domosdoshmëri, por shprehen të pakënaqur me faktin se këta kontejnerë nuk janë në funksion, ata kërkojnë që ata të funksionalizohen sidomos tani kur ka filluar ngritja e temperaturave dhe ndjehet edhe më shumë kundërmimi që vjen nga kontejnerët aktual mbitokësor.
Berat Kryeziu ka thënë për tesheshi.com se vendosja kontejnerëve nëntokësor duhet të funksionalizohen sa më shpejt, dhe të shtohet numri i tyre që të zëvendësojnë ata aktual.
“Këta kontejnerët nëntokësor është e pakuptimtë se si nuk po aktivizohen. Siç po i shihni janë shumë modern dhe shumë të përshtatshëm dhe do të ndikonin që të hiqeshin këta kontejnerët e vjetër që kundërmojnë shumë, sidomos këto ditë kur do të ketë temperatura të larta. Unë mendoj se të gjithë kontejnerët e vjetër duhet të hiqen dhe në vend të tyre të vendosen këta nëntokësor dhe të zgjidhet çështja e kontejnerëve”, thotë Kryeziu.
Edhe Fidan Fetahu, thotë se kontejnerët nëntokësor duhet që të vendosen jo vetëm në zonën e qendrës së Prishtinës, por edhe në pjesët periferike.
“Me rastin kur të vendosën këta kontejnerë duhet që të mendohet edhe ndarja e mbeturinave, sepse aktualisht të gjitha llojet e mbeturinave hedhen në një kontejnerë pa u bërë ndarja e tyre.
Ndërsa presim nga Komuna e Prishtinës që sa më shpejt që t’i aktivizojë këta kontejnerët nëntokësor që tashmë janë të ndërtuar dhe të mos jenë vetëm si dekor”, u shpreh Fetahu./tesheshi.com/
