Komisionet e përhershme parlamentare kanë nisur konstituimin. Të paktën dy komisione, ai i Jashtëm dhe i Ligjeve kanë zhvilluar mbledhjet e tyre të para.
Ajo që ra në sy ishte fakti se deputetët kanë munguar, edhe pse nga drejtuesit e dy partive kryesore në vend, Edi Rama (PS) dhe Lulzim Basha (PD) ligjvënësve u është kërkuar që të jenë prezent në të gjitha punimet parlamentare, madje me kohë të plotë.
Në komisionin e Jashtëm ka munguar Klajda Gjosha, që mban pozicionin e nënkryetares. Mimi Kodheli, ish-ministrja e Mbrojtjes, drejton këtë komision, ndërsa tha se shumë shpejt do t´I kërkohet qeverisë një informacion i detajuar mbi çështjen e Ballist Morinës, pas vendimit të Gjykatës së Lartë kroate për tu ekstraduar në Serbi.
Ndërkohë te komisioni i Ligjeve, që drejtohet nga Ulsi Manja, ra në sy mungesa e ish-ministrit të Brendshëm, Sajmir Tahiri. Ky i fundit, shkoi me vonesë në komision, qëndroi disa minuta dhe u largua bashkë me kolegun e tij, Alket Hyseni. /tesheshi.com/
