Duke e konsideruar si të paligjshëm procesin e konstituimit të krerëve të rinj të bashkive të dalë nga 30 Qershori, ku në disa raste është dashur dhe hyrja me forcë në zyra prej rezistëncës së parardhësve të opozitës, kreu i kësaj të fundit Lulzim Basha tha se dhe edhe populli mund të veprojë njësoj me pushtetin.
“Në 30 qershor nuk ka pasur proces zgjedhor. Çdo hap është bërë në shpërdorim dhe prokuroria duhet të kishte nisur hetimet. Presidenti anuloi zgjedhjet. Çdo veprim qoftë me pasoja financiare si shpenzime për fushatë përbën vepër penale dhe duhet të hetohet. Por nuk ka demokraci nuk ka as drejtësi, as prokurori të pavarur. Precedenti i kapjes me dhunë të bashkive po e fut vendin në një situatë të rrezikshme. Zgjidhja e kësaj krize do vijë përmes normave europiane. Kush do ta pengojë popullin nesër të futet me dhunë në kryeministri dhe në çdo ministri? Kapja me dhunë e pushtetit vendor hedh në erë vendin”, tha Basha në një dalje për mediat.
Ndërkohë, ai tha se në kampin e opozitës nuk ka asnjë përçarje dhe se 13 Tetori ishte data e ligjshme e zgjedhjeve, paçka se PD nuk pranon të marrë pjesë dhe në to.
“Nuk ka asnjë përçarje në gjirin e opozitës, Ne e kemi thënë se 13 tetori është e vetmja datë kushtetuese. KQZ duhet të nisë procedurat ndryshe do vihet para përgjegjësisë ligjore dhe penale. Vendimet e partive janë partiake, nuk dënohen nga ligji, ndërsa institucionet po”, theksoi Basha. /tesheshi.com/
