“Ne fituam zgjedhjet elektorale. Fitorja na jep përgjegjësinë për të udhëhequr vendin tonë, që është në një gjendje të vështirë. Eshtë i mirëpritur kush dëshiron të luftojë me ne për cilësinë e jetës në Kroaci,” u tha mbështetësve Tomislav Karamarko, udhëheqësi i opozitës, i partisë HDZ.
Opozita konservatore krotae duket se do të marrë pushtetin pas një fitoreje të ngushtë në zgjedhjet elektorale, siç sugjerojnë rezultatet paraprake të ditës së sotme.
Rezultatet treguan se Koalicioni Patriotik i udhëhequr nga HDZ-ja ka siguruar 59 vende në parlamentin me 151 deputetë, ndërsa blloku i qendrës së majtë, që gjendet në pushtet prej katër vitesh, ka pësuar rënie, duke nxjerrë më pak se 55 deputetë, kur janë numëruar pjesa më e madhe e votave.
Këto qenë zgjedhjet e para të përgjithshme në Kroaci që kur vendi iu bashkua BE-së dy vite më parë. Qeveria e socialdemokratëve, e udhëhequr nga kryeministri Zoran Milanoviç, qe zhgënjyese për qytetarët kroatë, duke mos qenë në gjendje ta reformojë sektorin publik dhe t’i japë një shtysë ekonomisë e ta bëjë më të pranueshme klimën e biznesit.
Qeveria e re do të ketë detyrën e vështirë të vazhdimit të reformave, ndërsa po dilet dalëngadalë nga gjashtë vitet e recesionit. Mes problemeve të rënda me të cilat do të përballet qeveria e re është dhe çështja e refugjatëve, pasi Kroacia është në rrugëkalimin e tyre drejt vendeve më të zhvilluara të BE-së. /tesheshi.com/
