Duket se zgjedhja e kryetarit të ri të partisë opozitare konservatore, Demokracisë së Re, i ka dhënë menjëherë efektet e veta. Kiriakos Micotaqis e mori vetëm pak ditë më parë drejtimin e Demokracisë së Re, por kaq ka mjaftuar që anketimet t’i nxjerrin konservatorët para partisë në pushtet, Sirizës, në parapëlqimet e publikut.
Kështu, për herë të parë pas një viti, Demokracia e Re është më popullore se Siriza e kryeministrit Cipras. Anketimi i publikuar dje në të përjavshmen Proto Thema flet për 21.3 për qind të të anketuarve që janë shprehur në favor të Demokracisë së Re kundrejt 18 për qind të tyre që kanë zgjedhur të tregojnë pëlqimin për Sirizën. Në të njëjtën linjë janë pak a ashumë raportet edhe në anketimin për gazetën Parapolitika, me konservatorët që kryesojnë me 23.6 për qind karshi 19.9 për qind të qeverisësve të sotëm.
Partia e kryeministrit Aleksis Cipras i la dy herë në opozitë neodemokratët vitin e shkuar, duke e thelluar krizën e konservatorëve, por zgjedhja e Kiriakos Micotaqisit si kryetar i Demokracisë së Re ka bërë që gjërat të ndryshojnë.
Veç kundërshtisë së hapur të Micotaqisit ndaj populizmit të të majtëve në qeverisje, ngjan që një faktor në përtëritjen e konservatorëve të jetë përpjekja e kryetarit të ri për ta hapur partinë drejt qendrës, me synimin për ta zgjeruar sferën e votuesve të saj. /tesheshi.com/
