Nesër britanikët kanë zgjedhjet e përgjithshme, por askush nuk di të thotë gjer tani se cila parti do të jetë fituese. Sondazhet i tregonin deri para pak kohësh me të njëjtën mbështetje konservatorët dhe demokratët, te 33 për qind. Diçka ka lëvizuar në drejtimin e duhur për konservatorët e Cameron-it në ditët e fundit, teksa duket se ata kanë fituar një epërsi të lehtë, duke kaluar në 35 për qind, por që gjithsesi mbetet një shifër aspak entuziaste.
Me siguri mund të thuhet vetëm diçka, që asnjë parti nuk do të mund të fitojë shumicën e duhur për të krijuar e vetme qeverinë, kështu që të nesërmen e zgjedhjeve mund të kemi një panoramë të përsëritur të vitit 2010. Atë mot konservatorët fituan zgjedhjet, por jo shumicën prej 326 vendesh në parlament, të nevojshme për krijimin e qeverisë nga një parti e vetme. David Cameron-i u detyrua të bëjë koalicion me liberaldemokratët, me të cilët po e udhëheq vendin aktualisht.
Sipas të dhënave të fundit, në Mbretërinë e Bashkuar janë 41.692.818 votues të regjistruar, ndërsa 3.3 milionë të rinj do të votojnë për herë të parë në këto zgjedhje. Pjesëmarrja në votime gjatë 10 viteve të fundit ka qenë 65 për qind, me kulmin e arritur në vitin 2010.
Në rast se asnjë parti nuk fiton shumicën e duhur, Cameron-i do të vazhdojë të ushtrojë funksionin e tij, e ndërkaq do të fillojnë negociatat. Detyrën për krijimin e një shumice do ta ketë ai së pari, nëpërmjet koalicionit apo aleancave me partitë. Po qe se ai dështon në misionin e tij, detyra e krijimit të qeverisë i kalon partisë që vjen pas për numrin më të madh të votave, domethënëse, laburistëve.
Kyçi i zgjidhjes së enigmës duket se do të jenë prapë liberaldemokratët, të cilët janë treguar të kujdesshëm në këtë fushatë, duke mos e përjashtuar mundësinë e bashkëpunimit me asnjë parti, duke u lënë hapësirë për negociata si konservatorëve dhe demokratëve. /tesheshi.com/
