Konor Mekgregër është i bindur se nëse ndeshet sërish me Flojd Mejuedhër, do ta mundë keqas atë. Boksieri kontroversial që u ngjit nga artet marciale në katrorin e litarëve të boksit, deklaroi se është i bindur që do ta mundte kampionin absolut të botës në peshëm e mesme, Mejuedhër, me vendim unanim të gjyqtarëve.
Natyrisht që në këtë rast nuk bëhet fjalë vetëm për sedrën e dëmtuar të irlandezit, por për një sfidë të dëshiruar, që pak gjasa ka se mund të ndodhë. Por në sport, e veçanërisht në boks, kurrë mos thuaj kurrë. Për më tepër kur ndeshja mes MekGregor dhe Mejuedhër, arkëtoi shifra marramendëse dollarësh, që e bënë ndeshjen më të “shpenzuar” të shekullit.
Edhe pse nuk u ka dhënë më tepër “ushqim” mediave, sesa një dëshirë të tij, MekGregor ka garantuar se me boksin nuk e ka mbyllur, por përkundrazi do të vijojë të jetë prezent vazhdimisht në ring.
Megjithatë, në prag të një filmi që po xhirohet për karrierën e tij, MekGregor theksoi se nuk do të lërë pas dore edhe artet marciale, duke theksuar se shumë shpejt do të ndeshet në Oktagon, ringun e tij të preferuar.
Ndeshja e zhvilluar mes tij dhe Mejuedhër, u mbyll me nokaut teknik në raundin e 10-të, kur arbitrat ndërprenë një breshëri grushtash që 40-vjeçari amerikan po lëshonte drejt tij. Irlandezi nuk ishte dakord me ndërprerjen, madje këtë e deklaroi edhe para mediave, ku theksoi se do të rezistonte pa problem ndaj grushtave të Mejuedhër.
A do të ketë revansh mes të dyve? Nuk i dihet asnjëherë, edhe pse kampioni Mejuedhër, e deklaroi se do të ishte ndeshja e fundit e jetës së tij sportive. /tesheshi.com/
