Autoritetet kolumbiane të aviacionit kanë arritur në përfundimin se rrëzimi i avionit me klubin brazilian pranë Medelinit javë më parë ka ardhur për shkak të gabimeve të pilotit, të kompanisë ajrore dhe të rregullatorëve bolivianë.
“Asnjë faktor teknik nuk ishte pjesë e aksidentit. Gjithçka përfshinte gabim njerëzor, veç një faktori administrimi në administratën e kompanisë dhe organizimin e administrimin e planit të fluturimit nga autoritetet në Bolivi,” u ka thënë gazetarëve Freddy Bonilla, sekretari kolumbian për Sigurinë Ajrore.
Sipas tij, autoritetet e aviacionit në Bolivi dhe kompania ajrore “pranuan kushte për fluturimin, të paraqitura në planin e fluturimit, që ishin të papranueshme”.
Duke hedhur dritë mbi ngjarjen që u mori jetën 71 personave, Bonilla u ka treguar gazetarëve, se përveç mungesës së lëndës djegëse, avioni kishte patur rreth 400 kilogramë mbi peshën e lejuar, si dhe nuk ishte certifikuar për të fluturuar në lartësinë në të cilën po kryhej udhëtimi.
Avioni po mbartte për në Kolumbi ekipin brazilian të Çapekoenses, që do të luante në finalen e një kupe kontinentale; një finale që nuk u luajt kurrë. /tesheshi.com/
