Prokurorët holandezë nisën konkluzionet e tyre përfundimtare dje në gjyqin e të dyshuarve për rrëzimin e një aeroplani pasagjerësh të Malaysia Airlines në vitin 2014 mbi Ukrainën lindore, duke theksuar se viktimat “nuk kishin asnjë shans” pasi raketa goditi avionin.
Sipas Reuters, tre rusët dhe ukrainasi, të cilët janë të gjithë të lirë, mund të përballen me burgim të përjetshëm nëse dënohen për ndihmë dhe nxitje në aktivizimin e një sistemi raketash që gjuajti një raketë në një avion pasagjerësh ndërsa fluturonte nga Amsterdami në Kuala Lumpur.
Aksidenti vrau të 298 pasagjerët dhe anëtarët e ekuipazhit.
Në fjalën përmbyllëse, prokurorët thanë se avioni u rrëzua nga një raketë e prodhuar nga Rusia.
Asnjë nga të akuzuarit nuk ishte i pranishëm në gjykatë.
Një nga të dyshuarit, rusi Oleg Pulatov, dërgoi avokatë për ta përfaqësuar atë gjatë gjykimit.
Të tjerët, rusët Sergei Dubinsky dhe Igor Girkin, dhe ukrainasi Leonid Kharchenko, nuk kanë bashkëpunuar kurrë me gjykatën dhe po gjykohen në mungesë.
Aeroplani në fluturimin MX17 po fluturonte nga Amsterdami në Kuala Lumpur kur u rrëzua nga një predhë e gjuajtur nga një territor i kontrolluar nga forcat pro-ruse gjatë luftimeve me trupat ukrainase, sipas hetuesve ndërkombëtarë.
Pas vitesh grumbullimi të provave, një ekip i përbashkët hetimor ndërkombëtar (JIT) i udhëhequr nga Holanda arriti në përfundimin në vitin 2019 se raketa që goditi avionin e pasagjerëve vinte nga një bazë ushtarake ruse.
Qeveria holandeze ka thënë se e konsideron Rusinë përgjegjëse, por Moska e ka mohuar gjithmonë përfshirjen.
Prokurorët lidhën disa numra telefoni në detaje me të dyshuarit dhe përshkruan situatën në terren në Ukrainën lindore në korrik 2014.
Ata paraqitën të dhëna për bisedat e përgjuara të pjesëtarëve të forcave proruse, të cilët ankoheshin se nuk kishin armë kundërajrore.
Vendimi pritet të jepet në fund të vitit të ardhshëm. /tesheshi.com/
