Kongresi i Partisë Socialiste ka miratuar që më 9 prill do të zhvillohet referendum për votbesimin e kryetarit të partisë: Edi Rama.
Pas votimit të statutit ka vijuar debati Rama-Blushi. Kryeministri ka kërkuar mbajtjen e referendumit lidhur me statutin, për t’i dhënë fund, siç tha ai, “çdo alibie”. Ndërsa Blushi ka deklaruar se, “referendumi bëhet për çështje dhe jo njerëz” dhe ka shtuar se, me votimin e statutit të ri janë shkelur të gjitha normat.
“Shumica nuk duhet të marrë fuqinë e atyre që e bëjnë zgjedhjen e kryetarit. Propozoj një referendum për t’i dhënë fund çdo alibie. Një referendum demokratik brenda partisë që rikonfirmon atë që ne jemi. Të tregojmë që pavarësisht shumicës nga cepi në cep të kësaj salle, nuk i imponohemi një pakice sado të vogël, por i japim mundësi edhe asaj që të ndihet mirë duke marrë përgjigjen jo me tirani, por me votë të lirë dhe të fshehtë nga gjithë anëtarët e PS”, tha Rama.
I është përgjigjur menjëherë Ben Blushi: “Besoj se parafolësi ka konflikt interesi lidhur me këtë temë, por megjithatë kjo nuk është surprizë. Referendumi nuk bëhet për njerëz, zgjedhjet bëhen për njerëz”.
Në favor të Ramës ka dalë kryetari i grupit parlamentar Gramoz Ruçi, i cili duke hedhur poshtë tezën e Blushit ka theksuar se, sa i takon pozitës së kryetarit të partisë ka opsione të tjera.
“ Ka të drejtë për mocione mosbesimi nga grupi parlamentar, asambleja, anëtarët e kongresit. A ka një mocion mosbesimi ndaj Edi Ramës? Jo, nuk ka”.
Në fund me propozim të Ruçit u la që 6 prilli të jetë dita e referendumit për të votbesuar Edi Ramën.
/tesheshi.com/
