Dy ditë pasi u pajtua me idenë për zgjedhje në 13 Tetorin e Metës, e kjo pa e përmendur kushtin “pa Ramën”, kreu demokrat Basha deklaroi nga Vjena sërish të kundërtën.
“Në Vienë me përfaqësuesit e lartë të OSBE ndamë shqetësimin për krizën dhe qëndrimin e pandryshuar të Opozitës së Bashkuar: zgjedhje të lira e të ndershme me një qeveri tranzitore pa Edi Ramën, që garanton lirinë e votës dhe ndëshkimin nga drejtësia të hajdutëve të zgjedhjeve”, shkruan Basha.
Ky kthim në pozitën e mëparshme të një kushti të panegociueshëm, e gati të pamundur të realizueshëm, e bën edhe më konfuze situatën brenda kampit PD-LSI, pasi nga kjo e dyta është deklaruar përgatitja për 13 Tetorin, edhe pse kjo datë mbetet e papërfillshme, si nga mazhoranca e si nga ndërkombëtarët, që për më tepër as që njihet nga këta të fundit e as është llogaritur ndonjëherë si opsion.
E nga ana tjetër, presidenti deklaron se duhen inkurajuar të tjera forca për të marrë pjesë në sfidën e 13 Tetorit
“Opozita të jetë e përgjegjshme për të marrë pjesë në këto procese demokratike. Në rast se opozita nuk dëshiron të marrë pjesë në një proces të ligjshëm, opozita fjala vjen Partia Demokratike, LSI-ja, disa parti të tjera, atëherë jam i sigurt që do të inkurajohen disa forca të tjera politike, të cilat të paktën të kenë kandidatë në të gjithë Shqipërinë e të regjistrohen në kohë”, tha Meta, duke i qëndruar pra ende 13 Tetorit të tij, për momentin vetëm virtual. /tesheshi.com/
