Darejja, një rrethinë e Damaskut, u rrethua katër vite më parë nga forcat qeveritare. Një marrëveshje evakuimi ka bërë të mundur që sot të nisë largimi i njerëzve që andej.
Luftëtarët rebelë dhe forcat qeveritare arritën një marrëveshje të enjten për evakuimin e zonës së banuar. 800 rebelë dhe 8.000 civilë priten ta lënë rrethinën.
Autobusët e para e kanë lënë rrethinën të shoqëruar nga autoambulancat dhe makinat e Gjysmëhënës së Kuqe.
Luftëtarëve rebelë do t’u lihet rruga e hapur për të vajtur në Idlib, kurse civilët do të dërgohen në strehimet qeveritare në Damask.
Staffan de Mistura, i dërguari special i OKB-së për Sirinë, e përshkroi gjendjen në Darejja si tragjike. Por OKB-ja, e cila ka bërë shpesh thirrje për heqjen e rrethimit, nuk ka qenë pjesë e marrëveshjes, sipas zyrës së De Mistura-s.
Gjithsesi, shqetësim gjatë evakuimit mbetet siguria e civilëve, një pjesë e mirë e të cilëve janë të afërm të rebelëve.
Qindra njerëz u vranë në vitin 2012 në Darejja, përfshirë dhe civilë, kur forcat e sigurisë vërshuan pas marrjes së armëve nga vendasit kundër regjimit. Rrethina ka qenë e rrethuar që asokohe. /tesheshi.com/
