Kryetari i Kuvendit, Ilir Meta mësohet se ka kërkuar sqarime në rrugë institucionale për shortin e hedhur për KED, një ditë pas konfliktit Lu-Lalla, ku përzgjedhja e gjyqtarëve ishte një nga argumentet e akuzave të ndërsjellta. Prokurori i Përgjithshëm Adriatik Llalla zhvilloi edhe një takim 30-minutësh me kreun e Kuvendit, Ilir Meta.
Një ditë më parë ambasadori amerikan Donald Lu akuzoi kryeprokurorin për shkelje të Kushtetutës lidhur me shortin e KED-it.
“Shorti u drejtua siç duhet nga sekretari i Përgjithshëm i Kuvendit, por prokurori i Përgjithshëm dhunoi frymën e Kushtetutës duke dërguar një listë me 3 prokurorë për të plotësuar 3 pozicione”, tha Lu. Ndërsa në kundërpërgjigje, Prokuroria e Përgjithshme e kundërshtoi këtë argument.
Ndërkohë, rreth mesditës është planifikuar të mblidhet këshilli i Sigurisë Kombëtare, por nuk njoftohet nëse përplasja e fundit do të jetë në axhendë, e cila ka prioritet çështjen Balili. /tesheshi.com/
