Një zëdhënës ushtarak njoftoi të premten në Baku se forcat armene vranë një ushtar azerbajxhanas pas përplasjeve në vijën e frontit të Nagorni-Karabakut.
“Armenët shkelën më 26 mars një armëpushim në sektorin lindor të vijës së frontit të Karabakut,” deklaroi një zyrtar azerbajxhanas i Ministrisë së Mbrojtjes.
“Në aksion u vra një ushtarak azerbajxhanas,” tha zyrtari, pa dhënë hollësi të tjera.
Ky incident është në vazhdën e përplasjeve sporadike mes forcave armene dhe azerbajxhanase. Një përplasje e tillë u mori jetën tre armenëve javën e shkuar, duke e çuar në 22 numrin e të vrarëve gjatë këtij viti në të dyja anët.
Konflikti për rajonin e Nagorni-Karabakut e pati kulmin e tij në fillim të viteve 1990, i kthyer asokohe në një luftë të përgjakshme, por tensioni i vazhdueshëm prodhon herë pas here incidente përgjatë vijës që ndan dy palët ndërluftuese.
Përplasjet midis forcave armene dhe azerbajxhanase u intensifikuan sërish në janar pas një spiraleje dhune vitin e shkuar.
Separatistët etnikë armenë, të mbështetur nga Jerevani, e morën kontrollin e Karabakut gjatë konfliktit që la pas 30.000 të vdekur.
Dy palët nuk kanë arritur ende të nënshkruajnë një marrëveshjeje përfundimtare paqeje, me gjithë negociatat e vazhdueshme, dhe Karabaku njihet ende ndërkombëtarisht si pjesë e Azerbajxhanit. /tesheshi.com/
