Ernesto Valverde është trajneri i ri i Barcelonës. Konfirmimi ka ardhur, ashtu siç qe njoftuar dhe më herët, të hënën nga presidenti i klubit katalanas, Josep Maria Bartomeu.
“Ai është shumë i lumtur, shumë i entuziazmuar. Ai ka aftësinë, përvojën dhe njohurinë për këtë detyrë,” deklaroi Bartomeu në një konferencë shtypi për njeriun që do të jetë në dy sezonet e ardhshme, sipas kontratës, në stolin e Barcelonës.
Për 53-vjeçarin Valverde kanë vijuar fjalët e mira nga presidenti i klubit të tij të ri. “Ka stilin e duhur për ta stërvitur e udhëhequr si trajner këtë klub, si dhe e di si funksionon klubi. Ai është i pasionuar pas futbollit dhe është i interesuar për punën me teknologjinë e fundit.”
Por ç’e pret Valverde-n te Barcelona? Ç’lë pas Luis Enrique?
Marca flet për shtatë sfida në pritje te Barcelona për ish-teknikun e Bilbaos.
Së pari, kthimi te dominimi botëror. Ndonëse me tre sulmues të shkëlqyer, thotë Marca, katalanasit nuk janë më mbretërit e futbollit europian dhe botëror. Diçka që pritet t’i jepet zgjidhje nga Valverde.
Së dyti, është çështja Iniesta. Mesfushori nuk e ka përtërirë kontratën pas një sezoni ku ka luajtur më pak se ç’duhet, e kësisoj i bie barra trajnerit të ri ta bindë atë se është pjesë e projektit të tij e se duhet të vazhdojë të qëndrojë te Barcelona.
Së treti, një detyrë përpara për Valverde-n është zvogëlimi i varësisë së rezultateve nga treshja Messi, Neymar dhe Suarez. Tekniku duhet të gjejë mënyra të tjera për të shkuar te fitorja edhe kur një prej këtyre emrave të mos jetë në fushë.
Së katërti, është sfida e dhënies hapësirë dhe besim atyre që vijnë nga akademia e të rinjve, një burim i njohur talentesh te Barcelona. Pak prej tyre kanë mundur të jenë pjesë e formacionit kryesor gjatë periudhës trevjeçare të Luis Enrique-s.
Së pesti, administrimi i yllit argjentinas, tashmë pranë të tridhjetave. Koha e aktivizimit të Messi-t duhet të jetë e tillë që ai të japë më të mirën në fazën kulmore të sezonit, atëherë dhe kur loja e golat e tij peshojnë më shumë.
Së gjashti, vazhdon Marca, është marrëdhënia me mediat, që kërkon një përmirësim pas disa eksperiencave jopozitive në konferencat e shtypit të paraardhësit të Ernesto Valverde-s.
Së shtati, dhe së fundi, mbrojtja e Barcelonës kërkon të riparohet, për të shmangur gabimet e sezoneve të fundit dhe për t’ua bërë sa më të vështirë kundërshtarëve për të shënuar në portën katalanase.
Klasiket gjatë muajve të verës, përballjet me Realin e Madridit, tre të tilla, nuk premtojnë një fillim të lehtë të punës së teknikut të ri. /tesheshi.com/
