Komisioni qendror i zgjedhjeve në Bosnjë-Hercegovinë ka konfirmuar serbo-boshnjakun Mlladen Grujiçiq si kryetar të bashkisë së Srebrenicës pas zgjedhjeve lokale të 2 tetorit.
Ai do të jetë kryebashkiaku i parë serb i qytetit që nga viti 1999, pas zgjedhjeve të fituara me 54.4 për qind të votave.
Srebrenica është vendi ku u vranë mijëra muslimanë nga serbo-boshnjakët gjatë luftës së viteve ’90. 8.000 meshkuj muslimanë u masakruan në korrik të vitit 1995 në Srebrenicë; një masakër që gjykatat ndërkombëtare e kanë njohur si gjenocid.
Rivali i Grujiçiqit në zgjedhje, kryebashkiaku musliman në largim, Qamil Durakoviq, nuk e ka pranuar humbjen, duke pretenduar për parregullsi, e do ta apelojë rezultatin e zgjedhjeve. /tesheshi.com/
