Kombëtarja shqiptare e futbollit do të zbarkojë në Prishtinë në nëntor, për të luajtur një ndeshje miqësore me përfaqësuesen e Kosovës. Informacionet që po qarkullonin në mediumet shqiptare i ka konfirmuar Fadil Vokrri, president i FFK-së.
“Kemi biseduar para 3-4 ditëve, dhe nuk ka qenë problem arritja e një marrëveshje të tillë. Ideja ka qenë që ata të vijnë në Prishtinë pas kualifikimit, por meqenëse kjo gjë nuk qe e mundur atëherë, do ta luajmë këtë miqësore në datat e lira të FIFA-s për muajin nëntor. Takimi do të luhet në Prishtinë,” konfirmoi Vokrri.
FIFA ka në nëntor data të rezervuara për zhvillimin e ndeshjeve miqësore, kështu që, veç Shqipërisë, përfaqësuesja kosovare e futbollit po shikon mundësinë që të zhvillojë edhe një ndeshje tjetër. /tesheshi.com/
