Gruaja në krye të LSI-së, Monika Kryemadhi, ka konfirmuar aleancën e re opozitare me PD-në, siç e theksoi, me qëllim rrëzimin e Ramës. Ajo foli për protestat e pritshme, që gjithsesi nuk pranoi t’i cilësojë si një tjetër “çadër”.
“Nuk bëhet fjalë për një protestë, por për një vazhdë protestash. Diapazoni i protestës është shumë i madh. Do ta organizojmë protestën në një mënyrë shumë dimensionale. Nuk ka të bëjë me një individ, apo një proces brenda parlamentit, por ka të bëjë me familjen shqiptare. Do të jetë një nga protestat e mëdha, por nuk do të jetë një protestë që do të fillojë dhe do të mbarojë. Nuk e kemi vendosur datën. Finalja do të jetë realizimi i objektivit me sukses. Por nuk është çështje çadrash. Bashkëpunimi me PD do të kthehet në një front bashkëpunimi politik, kjo është shumë e rëndësishme. Do të ketë një agjendë afatgjatë me objektiv të qartë, rrëzimin e Edi Ramës”, tha znj. Kryemadhi.
Ndërkohë, ditë më parë Rama i parapriu protestave të paralajmëruara të opozitës PD-LSI, si një përpjekje e radhës për të penguar reformën në drejtësi. /tesheshi.com/
