Pronari rus i klubit të futbollit Chelsea, Roman Abramovich, ka marrë shtetësinë izraelite dhe tani jeton aty, konfirmoi të premten ambasadori i Izraelit në Rusi, Gary Koren.
“Ai e ka përfunduar procesin dhe ka marrë një pasaportë izraelite”, tha Koren në një intervistë në gjuhën ruse me radio stacionin Echo të Moskës.
Më parë, mediat izraelite raportuan se miliarderi hebre kishte fluturuar në Izrael dhe kishte marrë një letërnjoftim kombëtar.
I pyetur nëse Abramovich është tani njeriu më i pasur i Izraelit, Koren tha: “Po, edhe pse nuk e kam një listë të tillë”.
Diplomati izraelit theksoi se Abramovich do të marrë një mirëseardhje të ngrohtë, duke shtuar se shpreson që rusi të investojë së paku një pjesë të pasurisë së tij në ekonominë izraelite.
“Ndoshta ai do të mbështesë futbollin izraelit, pasi në fakt është në një gjendje të mjerueshme”, tha Koren, duke iu referuar suksesit të Chelsea dhe duke shtuar me dëshpërim: “Ah sikur të kishim vetëm një ekip futbolli në një nivel të tillë!”.
Konfirmim erdhi pas njoftimeve në media se Abramoviç, i cili bleu Chelsea-n në 2003, po përjetonte vonesa në rikonsiderimin e kërkesës së tij për një vizë të re britanike.
Kremlini këtë javë minimizoi rëndësinë e lajmeve mbi faktin se Abramovich po fitonte shtetësinë izraelite, teksa zëdhënësi i presidentit Vladimir Putin, Dimitri Peskov tha: “Një sipërmarrës merr shtetësinë izraelite, e çfarë pastaj?”. /tesheshi.com/
