Të drejtat e grave mbeten një nga sfidat kryesore për zhvillimin e shoqërisë së Kosovës, në veçanti në lidhje me të drejtën e tyre për ta trashëguar pronën.
Një gjë e tillë u konstatua në konferencën e organizuar sot për strategjinë kombëtare për të drejtat pronësore.
Ambasadori amerikan, Greg Delawie, pjesëmarrës në konferencë bëri të ditur se vetëm 4 për qind e grave trashëgojnë pronë, duke shtuar se të drejtat pronësore janë edhe të drejta të njeriut.
Kurse, zv. kryeministri Hajredi Kuçi, njëherit kryesues i komisionit për zbatimin e strategjisë, tha se gratë janë të përjashtuara nga e drejta pronësore dhe se është hera e parë që po merren drejtpërdrejt me të drejtat e qytetarëve.
Ndërsa ministrja e Drejtësisë, Dhurata Hoxha, tha se për një shoqëri të lirë e drejta pronësore është e drejtë elementare dhe se duhet hequr kufizimet të cilat pengojnë realizimin e plotë të të drejtave të njeriut.
“Mungesa e implementimit efikas të dispozitave ligjore që kanë të bëjnë me të drejtat mbi pronën e paluajtshme, shkalla e gjerë e informalitetit në fushën e të drejtave pronësore, zbatimi jo-konsistent i të drejtave pronësore, kanë ndikuar në dobësimin e sistemit të drejtave pronësore në Kosovë”, tha Hoxha.
Ndryshe, trashëgimia familjare në Kosovë është e rregulluar me Ligjin për familje, sipas të cilit e drejta e trashëgimisë u takon të gjithë anëtarëve të familjes, njësoj, pa marrë parasysh gjininë. /tesheshi.com/
