Në një komunikim online me median, kryeministri Rama komentoi disa nga çështjet shumëdebatuara të ditëve të fundit, veç epidemisë, ku veçoi sidomos legalizimin e kanabisit.
Sipas tij, nuk ka asnjë lidhje kjo që pritet të ndodh, me aksionin e viteve më parë në Lazarat.
“Unë e kam thënë më parë, nuk është koha për të folur për këtë çështje por për të vendosur në kontroll situatën me kultivimin e paligjshëm dhe trafikimin. Situata tani është vendosur në kontroll.
Kemi më shumë se një vit që punojmë për këtë projekt dhe faktikisht tani janë pjekur kushtet. Kjo është tani një trend botëror. Di që jemi në kohë dhe do e shtyjmë përpara këtë projekt. Jemi në kohën që duhet ta kalojmë brenda këtij sesioni parlamentar”, tha kryeministri.
Rama gjithashtu ofroi dhe përbetimin e radhës mbi fatin e Teatrit Kombëtar, duke këmbëngulur se godina ekzistuese do prishet me patjetër.
“Ai është një proces për të cilin unë jam shprehur tanimë nuk e di sa vite u bënë dhe jam njeriu i fundit që duhet të pyesni për ndonjë hap mbrapa. Jam i pari që e kam thënë që në 1998-99, në ato vite që ajo godinë duhet të shembet dhe Shqipëria duhet të ketë një teatër të denjë. Të gjitha argumentet janë evaruzuar. Të gjithë kanë të drejtë të kenë opinionet e tyre, por në fund vendos shumica. Ne jemi shumica dhe e kemi marrë këtë vendim dhe nuk shoh sesi pakica të caktuara mund të imponojnë në cdo formë vendimmarrje, që lidhen me kompetencat e pushtetit të mandatuar nga populli“, tha shefi i qeverisë.
Sa për aludimin e një përafrimi të sërishëm mes tij dhe Metës, Rama hoqi çdo iluzion. “Nuk shoh asnjë perspektivë për një rikthim në një koalicion me partinë e presidentit, sepse konteksti i sotëm dhe degradimi i vazhdueshëm i asaj force politike dhe detyrimet tona programore dhe bindja jonë se për ne është e mjaftueshëm të flasë puna dhe falë punës një aleancë me popullin na e bëjnë pa asnjë interes këtë temë diskutimi. Nuk kemi asnjë arsye të bëjmë koalicion dhe asnjë arsye. Po e përjashtoj këtë“, tha Rama.
I pari i qeverisë komentoi dhe shumë të përdorurin term “oligarkë”, duke thënë se është një sajesë që s’ka të bëjë fare me realitete politike.
“Unë i mbetem asaj që kam thënë sepse e besoj edhe sot në Shqipëri nuk ka oligarkë. Mjafton të referohemi tek termi dhe të nxjerrim konkluzion. Oligarkë nuk janë ata që janë sipërmarrës të pasur apo që përmes biznesit realizojnë të ardhura më shumë se të tjetër. Oligarkë janë ata që influencojnë drejtpërdrejtë vendimmarrjet e qeverisë dhe caktojë axhenda politike në interes të tyre. Nuk ka asnjë person që ta ketë këtë pushtet në Shqipëri dhe nuk kemi marrë asnjë vendim që nuk ka qenë i diktuar nga bindjet tona dhe në qasje me interesat e vendit. Ky term përdoret në mënyrë të gabuar dhe përsëritet vazhdimisht për të krijuar këtë ide të gabuar. Përflitet për një disa njerëz që nuk janë bërë të pasur se erdhëm ne në qeveri, por ndër vite dhe me ardhjen tonë ën pushtet mund të them se po paguajnë më shumë taksa e më parë“, tha Rama.
Sa për realitetin pandemik, i pari i qeverisë tha se ambicia për hapje është e madhe, por dhe ankthi gjithashtu.
“Rreziku është shumë i madh, por edhe mbyllja përtej një garancie ekuilibri mes ruajtjes së shëndetit dhe mbrojtjes së njerëzve. Brenda muajit duam që të hapen kufijtë tokësorë. Mundësia e një vale të re nuk është e vogël. Prandaj qytetarët të respektojnë rregullat, pasi mund të kalojmë situata edhe më të vështira nga sa kemi kaluara”, theksoi Rama, i cili, sa i takon turizmit, ngriti supet. “Është një dileme shumë e madhe pasi nuk është vetëm a do hapet turizmi, por çështja është si? Kam parë modele të ndryshme si 5 m distancë nga çadra në çadër… janë shumë improvizime”, theksoi Rama. /tesheshi.com/
