Presidenti i Kosovës, Hashim Thaçi kërkoi edhe një herë liberalizimin e vizave për qytetarët kosovarë, gjatë fjalës së mbajtur në Mynih në Konferencën e Sigurisë.
Por, ndërkaq, shefja e diplomacisë europiane, Federica Mogherini deklaroi se Brukseli pret që Kosova të përmbushë edhe kushtin e fundit: ratifikimin e Demarkacionit me Malin e Zi, në mënyrë që të liberalizohen vizat.
Pas takimit, vetë presidenti kosovar tha se, me Mogherinin “u pajtuam se Kosova ka bërë hapa të mëdhenj në politikë, ekonomi dhe sundimin e ligjit, ndërsa në rajon është promovuese e paqes dhe dialogut”.
Sipas një deklarate nga presidenca e Kosovës, konferenca e Sigurisë në Mynih ka qenë ngjarja më e pritur e vitit, sepse artikulohen edhe qëndrimet strategjike të administratës së re amerikane, Gjermanisë dhe Rusisë përmes fjalimeve të zëvendëspresidentit amerikan, Mike Pence, kancelares Angela Merkel dhe ministrit të Jashtëm të Rusisë, Sergei Lavrov. /tesheshi.com/
