Kryeministri Isa Mustafa, ashtu siç pritej në konferencën me gazetarë ku shpalosi punën e tij njëvjeçare të qeverisë nuk ka lë pa thumbuar partitë opozitare.
Kreu i ekzekutivit njëjtë siç bëri ditë më parë presidenti Thaçi, fajësoi opizitën për mos ratifikimin e Demarkacionit me Malin e Zi, derisa shtoi se nëse ka pasur devijime do ta rishqyrtojnë marrëveshjen, po nëse jo do të mbetet në jetë marrëveshja aktuale.
“Me keqardhje mund të them për mungesën e konsensusit për demarkacion për shkak të një kauze krejtësisht për përfitime politike. Qytetarët nuk mund të lëvizin pa viza për shkak të tekeve të disa njerëzve. Kjo mbetet pikë e zezë ne politikbërjen 17 vjeçare në Kosovë. Ne do të punojmë që kjo të zhbllokohet dhe në fillim te vitit të ardhshëm ta kalojmë Demarkacionin për të lëvizur lirshëm”, tha ai.
Mustafa foli edhe për veriun e Mitrovicës, ku pranoi se ka probleme në këtë pjesë dhe s’mund të fshehen ato.
“Gjendja atje nuk është si në pjesë të tjera të Kosovës. Ne duhet ta normalizojmë atë gjendje atje. Dialogu është i orientuar në normalizimin e gjendjes dhe këtë mund ta bëjmë vetëm përmes dialogut. Ne mund te krekosemi me lloj- lloj kërcënimi dhe qëndrimi. Po unë se kam natyrën e tillë ta bëj. Ligjin e kemi përpara dhe këto çështje t’i zgjidhim përmes ligjit. Kam pa ofendime të llojllojshme dhe te opozitës dhe tjerëve gjatë kësaj periudhe por unë kam vendos që pikënisjen time ta kam zbatimin e ligjit”, tha ai.
Kryeministri nuk harroi të përmend edhe Forcën e Sigurisë së Kosovës e cila sipas tij është e gatshme për shndërrimin në Forcë të Armatosur.
Disa prej suksese të arritura gjatë këtij viti, Mustafa përmendi rritjen ekonomike që tha se është më e lartë në rajon, për buxhetin që ai e quajti më të lartë në histori, për MSA-në, për marrjen e rekomandimit për liberalizimin e vizave, për rritje më të madhe të pensioneve, kodin telefonik, punën e organve të drejtësisë në luftën kundër krimit e korrupsionit dhe sukseset në anëtarësimin në UEFA dhe FIFA. /tesheshi.com/
