E quajtën komunist, por me sa duket Traktati i Varshavës (1955), paska ende ndikim në Poloni, përderisa “komunisti shqiptar” Armando Sadiku, është lojtari më i shtrenjtë i historisë së klubeve polake.
Pas marrëveshjes së arritur mes Zyrihut dhe Legias së Varshavës, zviceranët arkëtuan 1.5 milion euro me shitjen e sulmuesit shqiptar. Asnjë klub më parë në Poloni nuk kishte “hedhur” kaq para për të blerë një lojtar të huaj. Maksimumi “takati” i klubeve të këtij vendi ka qenë 1 milion euro, çka vërteton pritshmëritë për sulmuesin shqiptar.
E pavarësisht se mediat polake i dhanë koment pezhorativ blerjes së Sadikut, duke e quajtur komunist (edhe për shkak të spotit në favor të Partisë Socialiste dhe Edi Ramës, ku futbollisti mori pjesë), elbasanlliu i ka hyrë punës, për të qenë gati për golat “e rëndë”, që ka bërë zakon të shënojë.
Me sa duket, menaxherët e skuadrës kampione të Polonisë, Legias së Varshavës, përdorin “orë” të ndryshme trajtimi krahasuar me mediat lokale, pasi këtyre të fundit, u ka mbetur “sahati” në terminologjinë e para 25 vjetëve.
Për të mos thënë të para 70 vjetëve, kur Traktati i famshëm i nënshkruar në Varshavë, miqësoi vendet e Lindjes.
E për të “bashkëlidhur” historinë, futbollin modern, Sadikun dhe paratë e shpenzuara, nevojitet vetëm diçka…Goli i parë! /tesheshi.com/
