Udhëheqësi i Koresë së Veriut, Kim Jong-un ka paralajmëruar se vendi po kalon një “krizë të rëndë ekonomike” dhe bëri thirrje për të marrë masa urgjente, raportojnë media lokale.
Partia e Punës që ai udhëheq mbajti një seancë plenare gjatë fundjavës, ditë para përfundimit të ultimatumit të vendosur nga Shtetet e Bashkuara në bisedimet e saj për denuklearizimin.
Pyongyangu ka premtuar se nëse nuk arrihet përparim deri në fund të vitit, Uashingtoni do të marrë një “dhuratë të Krishtlindjes”.
Kim paralajmëron se është koha për të marrë vendime të rëndësishme në lidhje me zhvillimin ekonomik të vendit.
Ai u paraqiti përfaqësuesve të partisë detyrat që duhet të kryenin në mënyrë që të “korrigjojnë situatën në ekonomi si çështje urgjente”, njoftoi agjensia e Koresë së Veriut KCNA.
Koreja e Veriut nuk ka lëshuar kurrë statistika ekonomike deri më tani, dhe informacioni i vetëm për ekonominë e vendit është zakonisht nga jashtë.
Banka Qendrore e Koresë së Jugut raportoi në korrik se rritja ekonomike e Koresë së Veriut, e prekur nga sanksionet ndërkombëtare, kishte rënë 4.1 përqind gjatë vitit 2018, rënia më e madhe që nga kriza e madhe e viteve 1990.
Pas një afrimi gjatë takimit historik të Trump dhe Kim më 2018-ën, negociatat për programin bërthamor të Koresë së Veriut janë përsëri në ngërç, veçanërisht pas samitit të dështuar të udhëheqësve amerikanë dhe të Koresë së Veriut në Hanoi në shkurt. /tesheshi.com/
