Nga Bashkim Kastrati
Në vjeshtë të këtij viti pritet të funksionalizohet tregu mobil, i cili do të përmbajë vetëm prodhime vendore. Këto produkte do të jenë kryesisht bujqësore, por do të ketë edhe nga blegtoria si produkte të qumështit, mjaltë dhe produkte tjera.
Themelimi i tregut mobil të fermerëve në Prishtinë është projekt i përkrahur nga Zyra e Bashkimit Evropian në Kosovë dhe i implementuar nga Komuna e Prishtinës, në partneritet “Gratë në Biznes” dhe OJQ “CEED Kosova”.
Udhëheqësit e Komunës së Prishtinës thonë se ky treg do të pritet mirë nga qytetarët, pasi deri më tani nuk ka pasur ndonjë të tillë dhe gjithashtu është një mundësi e mirë që të promovohen sa më shumë produktet vendore.
Përkrahje e produkteve vendore është edhe njëri nga planet bazike programore të Lëvizjes Vetëvendosje, e cila është duke udhëhequr me Komunën e Prishtinës dhe si subjekt politik në vazhdimësi ka bërë fushata ndër vite për bojkotimin e produkteve të Serbisë dhe përkrahjen e produkteve vendore.
Zëdhënësja e Komunës së Prishtinës Miranda Mullafazliu-Bejta, ka thënë për tesheshi.com se ky treg është pritur mirë nga fermerët që pritet të përfitojnë nga ky projekt dhe qëllimi është që të shtohen së më shumë prania e produkteve vendore në tregun e Prishtinës.
“Për projektin e tregjeve mobile, Komuna e Prishtinës ka nënshkruar marrëveshje për bashkëfinancim me Zyrën e Bashkimit Evropian në Prishtinë në vlere prej afro 480.000 euro, prej të cilave 80% e shumës financohet në forme granti nga Bashkimi Evropian, kurse 20% financohet nga Komuna e Prishtinës”, thotë Mullafazliu-Bejta.
Ajo thotë se janë bërë të gjitha përgatitjet e duhura për ta realizuar këtë projekt dhe se është themeluar Komiteti Drejtues i projektit me përfaqësuesit nga të gjithë partnerët dhe është organizuar takimi me komunat e rajonit qendër, prej nga edhe do të përpilohen listat e fermerëve.
“Kontrata është nënshkruar në muajin dhjetor të vitit 2015, të gjitha fazat e projektit janë duke u realizuar sipas planit, dhe tregjet do të jenë të gatshme për vjeshtën e këtij viti. Ky projekt do të implementohet nga Komuna e Prishtinës në bashkëpunim me Gratë në Biznes dhe CEED Kosova”, theksoi Mullafazliu-Bejta.
Ja në cilat lokacione do të ketë tregje mobile
Zëdhënësja Mullafazliu-Bejta tregon se tregjet mobile do të funksionojnë në nëntë lokacione, në tri ditë të javës dhe lokacionet do të identifikohen nga Komuna e Prishtinës.
“Me projekt janë të planifikuara 100 stenda/hapësira, mesatarisht 33 stenda për një treg, të cilat gjatë vitit të pare do të jenë pa pagese për fermerët. Nga projekti do të përfitojnë 1200 fermerë të rajonit qendër, të cilët do të i ofrojnë produktet e tyre dhe me ketë do të ofrohet një shërbim me I mire dhe me cilësor për qytetarët”, u shpreh Mullafazliu-Bejta.
Lagjet ku do të filloj projekti janë: Kodra e Trimave, Tophane, Arbëria, Lakërishte, Sheshi, Dardania, Ulpiana, Bregu i Diellit dhe Mati.
Por kjo iniciativë nuk i ka pëlqyer edhe aq shumë atyre që shesin produkte bujqësore dhe produkte të qumështit etj., në tregjet kryesore të Prishtinës. Kjo për shkak se këto tregje mund të frekuentohen më pak, pasi që qytetarët do t’i kenë tregjet mobile më afër.
Tesheshi.com ka pyetur disa nga tregtarët që shesin produktet e lartcekura se a do të shitnin edhe ata në tregje mobile, por shumica e tyre kundërshtuan, pasi që sipas tyre disa nga lokacionet mund të jenë të papërshtatshme për të shitur.
“Nuk po me pëlqejnë shumë këto tregjet mobile për shkak se nuk janë të gjitha në qendër dhe nëse të bie që me shit në ndonjë pjesë apo lagje më periferike nuk ka shitje”, thotë njëri nga shitësit në tregun e gjelbër në Prishtinë. /tesheshi.com/
