Nga Bashkim Kastrati
Komuna e Prishtinës në bashkëpunim me Policinë e Kosovës janë aktivizuar për të ndalur taksitë ilegalë që qarkullojnë në kryeqytet. Numri më i madh i taksive ilegale janë në relacionin Fushë Kosovë – Prishtinë, por ka taksi ilegale edhe në relacionet brenda lagjeve të Prishtinës.
“Qëllimi i planit është vetëdijesimi i qytetarëve për zbatimin e rregullave të komunikacionit, ndërmarrja e masave preventive dhe atyre të ndëshkimit, dhe ndërmarrja e masave të nevojshme policore bazuar në ligje dhe udhëzime ekzistuese”, thuhet në njoftimin e Policisë.
Sipas këtij plani të ri operativ janë hartuar edhe gjoba të reja, gjobat për taksi ilegal janë paraparë prej 100 deri 800 euro, si dhe masa të tjera si shkyqja e veturës nga komunikacioni deri në pesë ditë, raporton gazetmetro.net.
“Ligji e parasheh se gjobat për taksi ilegal janë prej 100-800 euro, ashtu që fletëparaqitja së bashku me procesverbal të përpiluar nga inspektori i Komunës i paraqiten Gjykatës – Departamentit për Kundërvajtje”, thuhet në njoftimin e policisë.
Në relacionin Fushë Kosovë – Prishtinë në vitet e fundit kanë qarkulluar qindra taksi ilegale. Edhe qytetarët nga komunat tjera që kalonin nëpër Fushë Kosovë, bëheshin taksi, mjafton të ngritët gishti tregues që nënkupton se ajo veturë është taksi e linjës 1 dhe pasagjerët hipin.
Numri i madh veturave që kretinin ilegalisht punën e taksisë në linjën 1 ka qenë shumë i madh dhe ka ndikuar në ngarkesën dhe mbarëvajtjen e komunikacionit, sepse shoferët e këtyre taksive në tendencë për t’ia “grabitur” udhëtarët njëri tjetri shpesh shkelin rregullat e komunikacionit.
Por që nga dita e hënë inspektorati i Komunës së Prishtinës ka treguar dhëmbët. Atë ditë janë gjobitur dhjetëra taksi ilegale dhe disave i janë konfiskuar edhe veturat.
Kjo iniciativë i ka gëzuar taksitë e kësaj linje që kanë leje nga Komuna e Prishtinës apo Fushë Kosovës. Ata thonë se këto veprime është dashtë të ndërmerren më herët dhe se verifikimi për leje i taksive duhet të jetë i vazhdueshëm.
“Kjo iniciativë është shumë e mirë, pasi që është bërë një gjë e çuditshme, janë bërë me qindra persona që dalin me vetura dhe punojnë si taksi pa pasur fare leje. Ata vijnë nga qytete të ndryshme dhe punojnë në këtë relacion. Por ka edhe të tillë që vijnë nga Drenasi, Gjakova apo ku ta di, kalojnë nëpër Fushë Kosovë dhe na i marrin udhëtarët. Pastaj janë një kategori e njerëzve që punojnë në Prishtinë dhe ata kur të shkojnë në punë dhe kur te kthehen na i marrin udhëtarët”, thotë një taksi që ka leje pune nga Komuna e Fushë Kosovës.
Kostoja për të marrë një leje për punë si taksi është 27 euro për tre muaj, por shumica e atyre që kanë punuar deri më tani nuk e paguajnë këtë taksë fare, duke punuar pa leje.
“Kështu kërkun nuk ka, janë bërë qindra taksi. Disa i kanë veturat të vjetra që nuk e plotësojnë asnjë kriter për të punuar si taksi. Por më shqetësuese është se nuk ka as siguri. Mua me kanë thënë disa pasagjere që janë ngacmuar seksualisht nga këta taksi. Ka nga ta që punojnë deri në orë të vona e sheh regjistrimin e ka nga Mitrovica, Gjilani apo ndonjë qytet tjetër dhe në 11 të natës hipin vajza e gra. Kjo është e rrezikshme në aspektin e sigurisë”, thotë një taksist tjetër.
Taksitë ilegale kundërshtojnë inspektorët
Veturat që qarkullojnë si taksi në linjën 1, Fushë Kosovë – Prishtinë por që nuk kanë leje e kundërshtojnë inspektoratin për shkak të gjobave. Ata e kanë arsyen e zakonshme që punojnë për bukën e gojës dhe se shteti nuk po u jep mundësi tjetër për të punuar.
“Le të shkojnë me i ndalë e me i dënu ata që punojnë në qeveri që vjedhin me miliona euro, por na ndalojnë neve që punojmë sa për bukë. Këta nuk mendojnë fare për popullin por vetëm për vetën e tyre. As ne prej qejfit nuk po dalim, por nuk po kemi mundësi tjera”, thotë një taksist që nuk ka leje pune. Por edhe ai e pranon se janë bërë shumë taksi të tillë, por thotë se së pari duhet të ndalen taksitë ilegale që vijnë nga komunat tjera.
Ndërkaq, qytetarët e përkrahin ndaljen e taksive ilegale. Ata thonë se këto taksi duhet të pajisjen me leje adekuate për punë dhe përveç që paguajnë taksa, rritet edhe përgjegjësia e tyre në raport me pasagjerët dhe veprimet në komunikacion.
“Më thënë të drejtën neve si udhëtar nga konvenojnë këto taksi, pasi që për të shkuar në Prishtinë, apo për t’u kthyer në Fushë Kosovë nuk presim asnjë minutë. Ka shumë shpesh lëvizje. Por pavarësisht kësaj ata që duan ta bëjnë këtë punë duhet të pajisen me leje pune. Gjithashtu është shumë e domosdoshme që të ketë kritere se cilës veturë i jepet leja për taksi, pasi që ka ndodhur me udhëtua me këto taksi që kanë qenë shumë të vjetra, të papastra, apo ka raste kur vetura i ka pasur vetëm dy dyer”, thotë Egzon Berisha nga Fushë Kosova. /tesheshi.com/
