Nga Bashkim Kastrati
Të gjithë janë krenarë me xhudisten nga Peja Majlinda Kelmendi. Ajo është kampione e dyfishtë botërore dhe evropiane. Suksesin e saj po e ndjekin edhe disa të rinj, ndër to edhe Nora Gjakova, kampione e Evropës për grupmoshat U23, ku ajo është edhe fituese e shumë medaljeve në gara të ndryshme ndërkombëtare. Sukseset pas saj i kanë arritur edhe Distria Krasniqi dhe Akil Gjakova. Të gjithë këta janë pjesë e klubit të xhudos “Ippon” dhe për trajner kanë xhudistin e njohur, Driton Kuka.
Ky klub ka prodhuar talente të shumta të xhudos dhe këtë vazhdon ta bëjë edhe me gjeneratat e reja. Shumë klube të famshme botërore vijnë në Pejë për ta parë këtë klub dhe të stërviten aty për disa ditë, gjë që nuk ndodh edhe me klubet tjera të Kosovës. Pra, ky klub është shembull i një suksesi në nivel botëror.
Me suksesin e tyre sigurisht që janë të kënaqur edhe qytetarët e Pejës, por si duket jo edhe komuna. Kjo e fundit në fillim të këtij muaji ka ndarë si përkrahje financiare për klubin “Ippon” vetëm 2 mijë euro, shumë kjo mjaft e vogël për aktivitetin dhe koston e klubit në fjalë.
Pra, komuna, në bazë të mundësive buxhetore e ka vlerësuar të përkrahë klubin “Ippon” vetëm me 2 mijë euro, por në anën tjetër ka shpenzime të shumta për dreka e darka zyrtare, për telefona mobil dhe fiks, për derivate dhe shpenzime tjera që për shumëkënd konsiderohen edhe si shpenzime të luksit.
Në lidhje me shumën e ndarë nga Komuna e Pejës, ka reaguar ashpër trajneri Driton Kuka. Ai ka thënë se kjo nuk është ndihmë, por një nënçmim që i është bërë këtyre sportistëve.
“Shikoni turpin e ndarjes së subvencioneve për klubet në qytetin e Pejës! Klubi Ippon nuk e pranon këtë nënçmim asnjëherë! Nëse kjo mbetet kështu ne qysh sot e pezullojmë bashkëpunimin me Komunën e Pejës! Mirë që i keni ba publike le ta shoh krejt Bota sa po na vlerëson qyteti i lindjes!”, ka deklaruar Kuka.
Dhjetëra mijëra euro për shpenzime të “luksit”
Komuna e Pejës në vitet e fundit ka shpenzuar para të shumta për mallra dhe shërbime, dreka zyrtare, telefona, vetura e derivate. Sipas të dhënave të publikuara nga instituti “GAP”, e cila monitoron komunat e Kosovës, Komuna e Pejës në vitin 2014 ka shpenzuar 32 mijë euro vetëm në dreka zyrtare.
Po këtë vit, kjo komunë ka harxhuar 35 mijë e 622 euro për mbushje të telefonave mobil dhe 14 mijë e 862 euro për telefonat fiks. Shumë kjo që konsiderohet shumë e lartë, duke marrë parasysh gjendjen e rëndë socio-ekonomike me të cilën përballen qytetarët e Pejës.
Po në vitin 2014, edhe shpenzimet për derivate kanë qenë të larta. Vetëm karburant për veturat zyrtare janë shpenzuar 143 mijë e 176 euro. Për mallra dhe shërbime janë shpenzuar hiç më pak se 2 milionë e 261 mijë e 101 euro, ndërsa për paga dhe meditje vetëm brenda këtij viti janë shpenzuar 11 milionë e 925 mijë e 237 euro. Vetëm mëditjet e udhëtimeve zyrtare jashtë vendit i kanë kushtuar komunës 12 mijë e 656 euro.
Edhe në vitin 2013, Komuna e Pejës ka shpenzuar para për kategori të tilla, që ndoshta me pak kursime do të mund të ndante më shumë mjete financiare për klubet e suksesshme të qytetit.
Në këtë vit për telefona janë shpenzuar 30 mijë e 600 euro, për shpenzime të udhëtimeve janë shpenzuar 56 mijë euro, për derivate dhe lëndë djegëse janë shpenzuar 709 mijë euro, për paga dhe meditje janë shpenzuar 10 milionë e 482 mijë e 700 euro dhe për mallra dhe shërbime 2 milionë e 705 mijë euro.
Duke parë shifra aq të larta të shpenzimeve për kategori të cekura më lartë, mund të thuhet se paraja e qytetarëve të Pejës po shpenzohet në masë të madhe edhe për kategori ku mund të bëheshin kursime dhe me ato para të planifikohej ndonjë ndihmë për sportin apo për kategori sociale.
Por kjo dukuri nuk është e pranishme vetëm në Komunën e Pejës, pasi shpenzime të tilla bëjnë edhe komunat tjera të Kosovës; bile shpenzojnë shuma edhe më të mëdha. /tesheshi.com/
