Kryebashkiaku i Tiranës, Erjon Veliaj përuroi këndin e gjashtë të lodrave për fëmijë dhe sheshin rekreativ tek Komuna e Parisit. Ai vlerësoi punën e bërë edhe me mbështetjen edhe të donatorëve, si dhe krahasoi rëndësinë e këtij investimi me atë tek Liqeni Artificial.
Në bashkëbisedimin e tij me fëmijët, kryebashkiaku u kërkoi atyre dhe prindërve që ta mirëmbajnë dhe të mos e dëmtojnë. “Dua që t’ju lë një porosi: E di se ju kujdeseni që lodrat dhe lulishtet t’i mbani pastër, por na ndihmoni edhe me të rriturit, që ata të mos bëjnë pis”, u tha ai fëmijëve.
Veliaj tha se deri në fund të vitit, të gjitha lagjet e Tiranës do të kenë këndit e tyre të lodrave.
Sheshi rekreativ te Komuna e Parisit u krijua pas rikonceptimit të të gjithë hapësirës së lulishtes së mëparshme, e cila ishte degraduar plotësisht. Në gjithë sheshin janë shtruar rreth 300m2 trotuare të reja të pajisuara me rampa, me sinjalistikë të re, gjithashtu janë shtuar rreth 40m2 gjelbërim, i shtrirë jo vetëm brenda lulishtes, por edhe në ambientin rrethues të saj. 9 nga pemët e reja janë marrë nga sheshi “Skënderbej”, pas punimeve që po kryehen në këtë shesh, i cili falë projektit të bashkisë do të kthehet në pedonale në shërbim të qytetarëve.
Në ambientin e rikonceptuar tërësisht janë vendosur lodra të ndryshme për fëmijët e të gjitha grupmoshave, por edhe 17 stola që do të shërbejnë si mjedise çlodhëse për prindërit apo gjyshërit dhe gjyshet e më të vegjëlve./tesheshi.com
