Talibanët paralajmërojnë Turqinë: Ne i konsiderojmë forcat e huaja të mbetura në atdheun tonë një okupim, dhe pushtuesit
Talibanët paralajmëruan Turqinë se do të përballej me pasoja nëse fillon një mision për të marrë kontrollin e Aeroportit Ndërkombëtar të Kabulit. Ndaj, ata dërguan një letër paralajmëruese.
“Të gjithë janë të vetëdijshëm se të gjitha forcat e huaja do të tërhiqen nga atdheu ynë i dashur në bazë të Marrëveshjes së Doha-s – një vendim i mbështetur nga Kombet e Bashkuara dhe komuniteti ndërkombëtar, d.m.th. i pranuar dhe mbështetur nga shumica e vendeve, përfshirë ministrin e Jashtëm turk i cili ishte i pranishëm në takimin e ceremonis së nënshkrimit”, thuhet në fillim të letrës, ku më tej vijohet:
“Duke qenë se Turqia ka njoftuar mbajtjen e trupave të saj dhe zgjerimin e pushtimit të vendit tonë me urdhër dhe në marrëveshje me Amerikën, është e rëndësishme të tregojmë sa vijon:
– Emirati Islam i Afganistanit dhe populli afgan mbajnë lidhje historike, kulturore dhe fetare me popullin musliman të Turqisë. Zgjatja e pushtimit do të zgjojë në vendin tonë ndjenjat e pakënaqësisë dhe armiqësisë ndaj zyrtarëve turq dhe do të dëmtojë lidhjet dypalëshe.
– Vendimi i udhëheqësve turq është i pamatur, është shkelje e sovranitetit dhe integritetit tonë territorial dhe është kundër interesave tona kombëtare. Emirati Islam i Afganistanit dënon ashpër një vendim të tillë të pamatur që krijon vetëm probleme midis Turqisë dhe Afganistanit. Ne u bëjmë thirrje zyrtarëve turq të rishikojnë vendimin e tyre pasi është i dëmshëm për të dy vendet.
– Ne e konsiderojmë qëndrimin e forcave të huaja në atdheun tonë nga çdo vend dhe nën çdo pretekst të jetë, si një okupim, dhe ne do t’i trajtojmë pushtuesit në bazë të një fetvaje të lëshuar në 1422 (2001).
– Ne i bëjmë thirrje popullit turk musliman dhe politikanëve të tyre të zgjuar që të ngrenë zërin e tyre kundër një vendimi të tillë, sepse ai nuk i bën dobi Turqisë ose Afganistanit, por vetëm krijon probleme midis popujve tanë.
– Ne përpiqemi për marrëdhënie të mira dhe pozitive me të gjitha vendet mbi bazën e respektit reciprok. Ne nuk ndërhyjmë në punët e njerëzve të tjerë dhe as nuk lejojmë që të tjerët të ndërhyjnë në punët tona.
– Ne u kujtojmë zyrtarëve turq se është më mirë të mbajmë marrëdhënie pozitive dhe të mira në dritën e parimeve të pranuara, t’i japim një dorë bashkëpunimi njëri-tjetrit, në vend që të marrim vendime të pamenduara mirë.
– Ne kemi qenë në kontakt me zyrtarët turq për disa kohë, ne kemi zhvilluar disa takime ku ata na kanë siguruar që nuk do të marrin një vendim të njëanshëm pa miratimin tonë.”
Në fund të letrës, talibanët paralajmërojnë Turqinë se do të përballet me përgjigjen e tyre vendimtare nëse vazhdon të kryejë misionin e njoftuar në aeroportin e Kabulit.
“Në atë rast, ata që ndërhyjnë në punët e njerëzve të tjerë dhe marrin vendime të tilla të pamatura do të jenë përgjegjës për të gjitha pasojat,” përfundon letra paralajmëruese e talibanëve.
Kujtojmë, Turqia mori mbështetjen amerikane dhe nga zyrtarët afganë për të marrë kontrollin e aeroportit ndërkombëtar në Kabul. Por talibanët e kundërshtojnë atë, duke paralajmëruar Ankaranë për pasojat.
Ministri i Jashtëm turk Mevlüt Çavusholu tha njëzet ditë më parë se operacioni dhe siguria e aeroportit janë shumë të rëndësishme për Afganistanin, duke e përshkruar atë si një hyrje afgane në botë.
“Administrata afgane gjithashtu dëshiron që Turqia të qëndrojë këtu,” tha Çavusolu. “Ne gjithmonë kemi thënë se do të qëndrojmë pranë Afganistanit dhe do të jemi në Afganistan për aq kohë sa është e nevojshme.”
“Turqia do të luajë një rol udhëheqës në sigurimin e sigurisë në Aeroportin Ndërkombëtar të Kabulit, pas tërheqjes së forcave të NATO-s nga Afganistani,” tha në fund të muajit të kaluar Këshilltari i Sigurisë Kombëtare i SHBA, Jake Sullivan. /tesheshi.com/
