Dhjetëra mijëra persona kanë marshuar në qytetet anembanë Gjermanisë për të protestuar kundër populizmit të djathtë dhe nacionalizmit. Marshimi vjen pak ditë përpara votimeve vendimtare të Parlamentit Evropian.
Demonstratat e së dielës u mbajtën nën moton “Një Evropë për të gjithë: Zëri juaj kundër nacionalizmit”, dhe u zhvilluan në qytetet Berlin, Këln, Leipzig, Frankfurt, Mynih dhe Hamburg.
“Unë jam këtu, sepse nuk dua të shoh si vendimmarrëse një parti nacional-socialiste që bëri trazira dikur. Kjo nuk duhet të ndodhë kurrë më,” tha 74 vjeçarja Renata Foigt, duke iu referuar ideologjisë së Gjermanisë naziste.
“Po shpresoj që sa më shumë njerëz të dalin në rrugë për të thënë ‘Stop’.”
Agjencia e lajmeve të DPA raportoi se më shumë se 20,000 njerëz dolën në protestë në Berlin, ndërsa Mynihu dhe Hamburg patën pjesëmarrje prej 10,000 personash secili.
Më tepër se 14,000 persona janë mbledhur edhe në rrugët e Frankfurtit.
Në Këln, organizatorët vlerësuan se 45,000 njerëz morën pjesë në marshim – duke tejkaluar pritshmërinë prej 25,000 marshuesve.
Parlamenti Europian prej 751 vendesh ka fuqi të kufizuar, por zgjedhjet po shihen si një provë e forcës si nga grupet e krahut të djathtë – populistët dhe nacionalistët të cilët dëshirojnë uljen e emigracionit, ashtu edhe nga partitë kryesore të qendrës së majtë të cilat mbështesin BE-në si një bërthamë bashkëpunimi midis 28 shteteve të saj anëtare, dhe që kanë parim sundimin e ligjit dhe demokracisë.
Tubimi vjen pak pasi kreu populist i Italisë, Matteo Salvini, mblodhi nacionalistët e Evropës për një takim unifikues në Milan.
Salvini i Lidhjes anti-emigrante dhe Le Pen e Frontit Nacional duan që grupi i tyre i Aleancës për Europën e Kombeve dhe Lirive (ENF) të bëhet faktori i tretë vendimmarrës në Bruksel.
Qeveritë nacionaliste në Hungari, Poloni dhe Republikën Çeke gjithashtu po nxisin agjenda anti-emigrante dhe po përplasen me Brukselin.
Sondazhet e fundit tregojnë se partitë e ekstremit të djathtë, si Lidhja e Italisë, Partia Gjermane për Alternativën e Gjermanisë (AfD) dhe Fronti Nacional iMarie Le Pen (RN), priten të marrin mjaft ulëse në Parlamentin Europian. /tesheshi.com/
