Kompania amerikane Moderna Inc, ka dorëzuar grupin e parë të vaksinave të koronavirusit COVID-19 tek agjensitë kompetente shëndetësore në SHBA, në mënyrë që të mund të fillojnë testet e para njerëzore.
Ajo tha se kishte dërguar mostra të vaksinave në Institutin Kombëtar të Alergjive dhe Sëmundjeve Infektive (NIAID) dhe se pret që provat e para klinike njerëzore të fillojnë në fund të prillit. Rezultatet paraprake mund të jenë të disponueshme në korrik ose gusht, sipas Wall Street Journal.
Kompania përdori teknologjinë mRNA, e cila është mjaft premtuese sepse vaksinat e mRNA janë hipotetikisht më të shpejta dhe më efektive sesa ato të bazuara në ADN.
Arsyeja është se vaksinat me bazë ADN duhet të bashkëveprojnë me bërthamën e qelizës, ndërsa mRNA gjendet në të gjithë qelizën dhe për këtë arsye është shumë më e arritshme.
Nga ana tjetër, Organizata Botërore e Shëndetit (OBSH) njoftoi dje se po shpreson për një ilaç anti-Ebola – Remdesivir, i cili ka rezultuar i efektshëm në zvogëlimin e simptomave COVID-19.
Ajo shtoi se provat klinike tek njerëzit tashmë ishin duke u zhvilluar dhe se rezultatet mund të njiheshin brenda disa javësh.
Gilead Science, kompania që bën Remdesivir, konfirmoi për CNN se po bashkëpunon me ekspertë kinezë të shëndetit dhe se ilaçi po kalon dy prova klinike tek pacientët e infektuar me koronavirus.
“Ekzistojnë dy lloje të provave klinike; njëra tek pacientët me simptoma të rënda dhe tjetra te pacientët me simptoma të moderuara. Ne presim rezultate në prill,” tha Gilead Science. /tesheshi.com/
