Zëvendësdrejtori i përgjithshëm i Metrojet-it, kompanisë ajrore avioni i së cilës u rrëzua dy ditë të shkuara në Gadishullin e Sinait, deklaroi dje se e përjashtonte mundësinë e një defekti teknik apo të një gabimi të pilotit. “I vetmi shpjegim i mundshëm,” tha Aleksandër Smirnov, duke kërkuar të hedhë dritë mbi tragjedinë e fundjavës që lamë pas, “mund të jetë një impakt i jashtëm mbi avionin.”
Smirnov u shpjegoi gazetarëve në konferencën e shtypit se pilotët e kishin humbur tërësisht kontrollin e avionit dhe nuk kishin bërë asnjë komunikim në radio para se të përplaseshin.
Gjithsesi, ai nuk pranoi të japë hollësi të mëtejshme në lidhje me pretendimet e tij.
Hetimeve mbi rrëzimin e avionit, të udhëhequra nga autoritetet egjiptiane, u janë bashkuar një numër hetuesish ndërkombëtarë, ndërsa ende ka mjegull rreth shkakut të tragjedisë.
Avioni Airbus i Metrojet-it, një kompanie ruse, u rrëzua të shtunën në Gadishullin e Sinait, dhe prej 224 personave në të nuk pati asnjë të mbijetuar.
Një pjesë e mirë e trupave të viktimave janë kthyer tashmë në Rusi. /tesheshi.com/
