Mbledhja e radhës e komisionit “Tahiri”, është shoqëruar me debate mbi të drejtën e drejtimit. Kryetari de jure, Edi Paloka, nuk e ka gëlltitur faktin që kolegia socialiste, Ermonela Felaj, luajti rolin e kryetares në një mbledhje të thirrur njëanshëm pak javë më parë, teksa pala demokrate ishte zhvendosur në Gjykatën e Tiranës në mbrojtje të kuksianëve.
“Ju atë ditë keni uzurpuar postin tim. Nuk do ta toleroj më. Komisionin e drejtoj unë me të gjitha kompetencat që më jep ligji dhe kushtetuta, absolutisht nuk keni pasur të drejtë të mblidhni komisionin”, tha Paloka, i cili pos kësaj ankese ka shprehur dhe atë për mosdhënie informacioni të kërkuar nga disa institucione shtetërore, për rastin “Tahiri”.
Reagimi i znj. Felaj, juriste me profesion, më shumë se arsyetim juridik, ka qenë social: “Nuk ta zë vendin, mos kij merak”, ka thënë anëtarja socialiste e komisionit që do hetojë ish-kolegun e saj. /tesheshi.com/
