Komisioni Shtetëror për Shënjimin dhe Mirëmbajtjen e Kufirit Shtetëror ka publikuar sot dy harta të Kosovës, një të vitit 1974 kur kishte statusin e Krahinës Autonime në kuadër të Jugosllavisë dhe sot kur Kosova është e pavarur.
Komisioni ka përgënjeshtruar shkrimet sipas të cilëve me demarkacionin që do të bëhet me Malin e Zi do të ndryshojë edhe Harta dhe Flamuri Shtetëror i Kosovës.
“Sipas të gjitha dokumenteve zyrtare, akteve juridike, hartave kredibile, matjeve në terren, harta në Flamurin e Republikës së Kosovës është në përputhje të plotë, 100%, me shënjimin e kufirit ndërmjet Kosovës dhe Malit të Zi, i cili është propozuar për miratim në Kuvend”, thekson Komisioni në një deklaratë ër mediat.
Në deklaratë, Komisioni thekson më tej se “Republika e Kosovës, sipas procesit të kryer nga Komisioni Shtetëror do t’i ketë siç i ka pasur gjithnjë 10906 kilometra katror, siç është e paraqitur saktësisht në hartën, e cila ndodhet në Flamurin Shtetëror.
Kufiri i Kosovës në harta dhe dokumentacion zyrtar dhe me koordinata të sakta zyrtare është i pandryshuar sikurse shihet në hartën e bashkangjitur të vitit 1974 (shih harta 1) dhe në vitin 2015 (shih harta 2), të cilin kufi dhe koordinata gjithnjë janë përdorur nga komuna e Pejës.
Kjo nënkupton që ndryshim të vijës kufitare nuk kishte gjatë kësaj periudhe, të gjitha opinionet për vijë tjetër kufitare janë spekulime ose mungesë e njohurive për këtë çështje”, theksohet në deklaratë.
/tesheshi.com/
