Acarimi i dy partnerëve të qeverisë, PS-së dhe LSI-së, sot është shfaqur edhe në Komisionin Parlamentar të Ekonomisë, ku ka patur një afrim të qëndrimeve të PD-së dhe partisë së Ilir Metës.
Ajo që deklaroi Petrit Vasili te emisioni i Enkel Demit duket se kishte një qëndrim të ardhur nga lart kur tha se ministrat e LSI-së nuk kanë marrë pjesë në aksionin anti-informalitet të qeverisë.
LSI ka kundërshtuar një draft të Ministrisë së Financave për procedurat tatimore dhe dy deputetët e saj, Gjovalin Kadeli dhe Përparim Spahiu, kanë qenë kategorikisht kundër, por edhe gjuha e tyre ka qenë mjaft e ngjashme me qëndrimet e opozitës.
“Me gjithë këto masa do t’i merni frymën biznesit. Kështu si po veproni do të përkeqësoni më shumë situatën. Masat duhen për të ulur informalitetin dhe për të rritur të ardhurat”, tha Kadeli.
Neni që hasi rezistencën më të madhe ishte ai që parashikon mospagesën e produkteve në rast të mosmarrjes së kuponit tatimor. Ky nen u rrëzua.
Afrimi i vizitës së Edi Ramës në SHBA po ndesh një lëvizje të fortë në vend dhe prova për të parë se si do të sillen aleatët në qeverisje do të jetë séanca e së enjtes. Nëse LSI nuk do ta votojë ‘pro’ draftin e procedurave tatimore, kjo përbën një sinjal të qartë të një çarje të fortë mes aleatëve të mazhorancës. /tesheshi.com/
