Anëtarët e BE duhet të ndërmarrin hapa urgjentë për të diversifikuar furnizuesit për rrjetin 5G, tha Komisioni Evropian, duke kërkuar të zvogëlojë praninë e Kinës me Huawei në Evropë, ndërsa SHBA po i bën presion BE-së, si Britania, të parandalojë Huawei të marrë pjesë në rrjetin 5G.
Në nëntor të vitit të kaluar, Bashkimi Evropian vendosi të marrë një qëndrim të ashpër në lidhje me çështjen e furnizuesve 5G në mënyrë që të zvogëlojë rreziqet e sigurisë të gjeneratës së re të rrjetit celular, i cili konsiderohet kryesor për rritjen e ekonomisë dhe konkurrencës.
Strategjia përfshin uljen e varësisë së vendeve dhe operatorëve telekomunikues nga një furnizues i vetëm, raporton Reuters.
Prodhuesi më i madh në botë i pajisjeve të telekomunikacionit, Huawei, po garon me Nokia të Finlandës dhe Ericsson të Suedisë.
Eshtë bërë përparim, por mbetet shumë punë për të bërë, tha komisioni.
“Progresi është i nevojshëm për të zvogëluar rrezikun e varësisë nga furnitorët me rrezik të lartë, dhe gjithashtu duke marrë parasysh qëllimin e zvogëlimit të varësisë në nivelin e Unionit,” tha Komisioni në një raport-progres për 27 vendet anëtare të BE-së.
Heqja e furnizuesve me rrezik të lartë
“Sfidat janë identifikuar për të hartuar dhe zbatuar strategji të përshtatshme për diversifikimin e furnizuesve për operatorët celularë individualë ose në shkallë vendi, për shkak të vështirësive teknike ose operacionale,” shton komisioni.
Mungesa e ndërveprimit dhe madhësia e vendit përmenden gjithashtu si disa nga problemet.
Franca, duke u bashkuar me Britaninë, po vendos një ndalim de fakto për Huawei të marrë pjesë në një projekt për të mundësuar një rrjet 5G, thanë burime për Reuters këtë javë.
Uashingtoni pretendon se Pekini mund të përdorë ndërmarrjen me qendër në Shenzhen për të spiunuar, të cilën Huawei e mohon.
Zyrtarët e BE thonë se heqja e furnizuesve me rrezik të lartë dhe kostot shtesë nuk do të prishin krijimin e një rrjeti 5G në të gjithë Unionin dhe se Ericsson dhe Nokia do të jenë në gjendje të përballojnë kërkesën.
“Nëse shikoni situatën në të gjithë botën, Nokia dhe Ericsson kanë një pjesë të madhe të tregut global, për sa i përket kontratave të nënshkruara në të gjithë botën për të mundësuar 5G. Të dy kompanitë së bashku kanë më shumë se 50 deri në 60 përqind. Unë mendoj se furnizuesit evropianë mund të japin nga ajo që është e nevojshme, jo vetëm për Evropën, por për pjesën më të madhe të botës,” tha një zyrtar.
Komisioni gjithashtu ka kërkuar nga 13 anëtarë të BE-së të miratojnë, pa vonesë, një mekanizëm të monitorimit të investimeve të drejtpërdrejta të huaja.
Ky mekanizëm lejon që qeveritë e BE të ndërhyjnë në rastet e investimeve të huaja direkte në ndërmarrjet strategjike, veçanërisht nëse përfshihen kompani të huaja të kontrolluara ose të financuara nga shteti. /tesheshi.com/
