Komisioni Evropian do të propozojë shfuqizimin e orës verore në Bashkimin Evropian, tha presidenti i Komisionit, Jean-Claude Juncker në një intervistë me televizionin gjerman.
“Njerëzit e duan atë dhe ne do ta bëjmë atë”, tha Juncker për shërbimin publik ZDF.
Në një sondazh të kryer nga Komisioni Evropian, nga qershori deri në mes të gushtit, më shumë se 80 për qind e evropianëve thanë se do të donin që ora të mos ndryshonte, siç ndodh prej dekadash, njëherë në vjeshtë e njëherë në pranverë.
Disa vende të BE-së tashmë e kanë deklaruar veten jashtë ndryshimit të orës, si Lituania, Estonia, Letonia dhe Finlanda.
Kalkulimi i kohës verore u prezantua pas krizës së naftës në vitet 1970, me shpresën se do të kursente energji.
Që nga viti 1996, të gjitha vendet e BE kanë lëvizur orën përpara të dielën e fundit të marsit dhe e kanë kthyer atë të dielën e fundit të tetorit.
Në shumë studime, shkencëtarët kanë treguar se lëvizja e orës është e dëmshme për trupin. Pas propozimit të Komisionit Europian, çdo ndryshim në llogaritjen e kohës do të duhet të miratohet nga shtetet evropiane dhe në parlamentin e BE-së. /tesheshi.com/
