Komisioneri për Zgjerim, Johannes Hahn në konferencës për Marrëveshjen e Stabilizim Asociimit (MSA) në mes të Bashkimit Europian dhe Republikës së Kosovës që po mbahet në Prishtinë, ka thënë se kjo marrëveshje është e rëndësisë së veçantë për Kosovën, për shkak të fushave që përfshin.
“Kjo marrëveshje ka rëndësi edhe për shkak të lidhjes mes Europës dhe Kosovës, në shumë fusha – në demokraci dhe sundimin e ligjit, të cilat lidhen fort mes vete. Në aspektin ekonomik, marrëveshja ka rëndësi të madhe për thellimin e shkëmbimit ekonomik mes Europës dhe BE-së. Mendoj që Kosova duhet të përcjellë ato që kanë ndodhur në vendet fqinje pas hyrjes në fuqi të MSA-së, të cilat kanë shënuar rritje të madhe ekonomike”, tha Hahn.
Komisioneri Hahn ka pasur një mesazh të qartë për liderët kosovarë. Ai ka kërkuar nga zyrtarët e shtetit që të luftojnë krimin e organizuar dhe korrupsioni.
“Kosova duhet të punojë shumë në fuqizimin ekonomik, në luftimin e krimit të organizuar dhe të korrupsionit. Unioni është investitori më i madh në vendin tuaj, në ç’formë ne tregojmë mbështetje për rrugën tuaj dhe punën që bëni”, ka deklaruar Hahn.
Kurse, presidenti Hashim Thaçi i cili hapi konferencën tha se Bashkimi Europian ka rënë në dakord tashmë të bëj një marrëveshje për marrëdhënie ekonomike.
“Marrëveshja e Stabilizim Asociimit do të ndihmojë zhvillimin ekonomik të vendit dhe hapjen e vendeve të reja të punës. MSA do të ndikoj në rritjen e investimeve të huaja ku do të ketë edhe një vend më të mirë për të bërë biznes. Duke zbatuar MSA-në ne do të bëjmë një urë më BE-në për lëvizjen e lirë të mallrave”, theksoi presidenti.
Thaçi ka thënë se krahas aspektit ekonomik kjo marrëveshje i jep rëndësi edhe bashkëpunimit rajonal.
Ndërsa, kryeministri Isa Mustafa ka deklaruar se Bashkimi Europian është bashkëpunëtori kryesor i ekonomisë kosovare.
“Zhvillimi ekonomik është i lidhur drejtpërdrejt me forcimin e shtetit ligjor dhe në do të punojmë në këtë drejtim. Kjo marrëveshje i hap Kosovës rrugën për Bashkimin Europian. Kosova e ka konfirmuar se është drejt rrugës së integrimeve europiane duke i kryer të gjitha punët që na janë dhënë”, ka pohuar Mustafa. /tesheshi.com/
